МҮХАҮТ НЬ “ОЛОН УЛСЫН АЖИЛ ОЛГОГЧДЫН БАЙГУУЛЛАГА (IOE)-ЫН ГИШҮҮН БОЛЛОО

МҮХАҮТ нь 2024 онд зохион байгуулагдсан 112 дах удаагийн Олон улсын хөдөлмөрийн чуулганы үеэр Олон Улсын Ажил Олгогчдын Байгууллагад элсэх хүсэлтээ гаргаад байсан бөгөөд 2026 оны 3 дугаар сарын 27-нд зохион байгуулагдсан тус байгууллагын Удирдах зөвлөлийн хурлаар 100 хувийн саналаар дэмжигдэн албан ёсны гишүүн болсон байна.

Олон Улсын Ажил Олгогчдын Байгууллага нь 1920 онд байгуулагдсан, 140 гаруй орны 150 гаруй ажил олгогчдын төлөөллийн байгууллагуудыг эгнээндээ нэгтгэсэн, 50 сая аж ахуй нэгжийг төлөөлсөн Дэлхий нийтийг хамарсан ажил олгогчдыг төлөөлөх хамгийн том нэгдэл юм. 

Энэхүү байгууллагад элсэн орсоноор:

1. Монгол Улсын бизнесийн дуу хоолойг олон улсын бодлогын хэлэлцүүлгүүдэд хүргэх;
2. Далайд гарцгүй болон байгалийн нөөцөд тулгуурласан эдийн засагтай улсуудад тулгамдаж буй асуудлуудыг олон улсад таниулах;
3. Хөдөлмөрийн хууль, эрх зүйн шинэчлэл, БОНЗ-ийн шаардлага, комплаенсын чиглэлээр дэлхийн түвшний мэдлэг, туршлагаас суралцах;
4. Ажил олгогчдыг худалдааг хөнгөвчлөх, нийлүүлэлтийн сүлжээ, хил дамнасан бизнесийн чиглэлээр мэдлэг хуваалцах боломжоор хангах;
5. Дэлхийн болон бүс нутгууд дахь улс орнуудын танхимууд, ажил олгогчдын байгууллагуудтай шууд харилцаа тогтоох;
6. Хамтарсан төсөл, донорын түншлэл, бүс нутгийн хамтын ажиллагааны боломжийг бүрдүүлэх гэх мэт чухал ач холбогдолтой юм.