БИЗНЕС ЭРХЛЭГЧИД ОЛОН УЛСЫН СТАНДАРТЫН ШИНЖИЛГЭЭНИЙ ДҮГНЭЛТИЙГ ШУУРХАЙ АВАХ БОЛОМЖТОЙ БОЛЛОО
МҮХАҮТ болон Геологийн судалгаа шинжилгээний төв ТӨҮГ хооронд бизнесийн орчин дахь лабораторийн чадавхыг шинэ шатанд гаргахаар тохиролцлоо. Энэхүү түншлэл нь МҮХАҮТ-ын гишүүн аж ахуйн нэгжүүдийн хувьд гадаад худалдааны саад бэрхшээлийг бууруулах, бүтээгдэхүүний чанар стандартыг олон улсын түвшинд баталгаажуулах бодит боломжуудыг нээх ажээ.
Мөн хамтын ажиллагааны хүрээнд гишүүн байгууллагууд ГСШТ-өөр шинжилгээ хийлгэхэд хариу гарах хугацааг богиносгож, дараалал харгалзахгүй үйлчлэх нэн таатай нөхцөлийг бүрдүүлж байна. Мөн экспортын барааны гарал үүслийн гэрчилгээ олгох, баталгаажуулах үйл ажиллагааг цахимжуулснаар бизнес эрхлэгчид бүтээгдэхүүний шинжилгээний дүгнэлтийг шуурхай солилцох, цаасгүй худалдааг хэрэгжүүлэх замаар зардлаа хэмнэх боломж бүрдэж байгаа юм.
Түүнчлэн геологи, уул уурхай, байгаль орчны чиглэлээр үйл ажиллагаа явуулдаг компаниудад зориулж MNS ISO/IEC 17025 болон ISO 17034 зэрэг олон улсын стандартыг нэвтрүүлэх мэргэжлийн сургалт, зөвлөх үйлчилгээг үзүүлж, мэргэжилтнүүдийнх нь ур чадварыг системтэйгээр бэхжүүлснээр дотоодын аж ахуйн нэгжүүд олон улсын зах зээлд өрсөлдөх чадвараа нэмэгдүүлж, лабораторийн магадлан итгэмжлэл, чанарын удирдлагын дэвшилтэт тогтолцоог үйл ажиллагаандаа шууд хэрэгжүүлэх давуу талтай болж байна.
Санамж бичгийг МҮХАҮТ-ын Гүйцэтгэх захирал Ц.Магнайбаатар, Геологийн судалгаа шинжилгээний төв ТӨҮГ-ын захирал Б.Энхтөр нар үзэглэлээ.
