МОНГОЛЫН БИЗНЕС ЭРХЛЭГЧИД ӨВӨРМОНГОЛЫН ГАЗАР ТАРИАЛАНГИЙН ОЛОН УЛСЫН ТОМООХОН ҮЗЭСГЭЛЭНД ОРОЛЦОЖ, ТЕХНОЛОГИЙН ТУРШЛАГА СУДАЛЛАА
МҮХАҮТ-аас бизнес эрхлэгчдийг зохион байгуулан оролцуулсан БНХАУ-ын Өвөрмонголын Өөртөө Засах Орны Хөх хотноо зохион байгуулагдсан "XXXVIII удаагийн Өвөрмонголын олон улсын газар тариалангийн үзэсгэлэн" /2026.03.26-28/ амжилттай болж өндөрлөлөө.
Энэ удаагийн үзэсгэлэн нь "Хөдөө аж ахуйн шинэ чанарын бүтээмжийг нэмэгдүүлж, ухаалаг технологийг хөгжүүлэх" уриан дор зохион байгуулагдсан бөгөөд нийт 50,000 ам метр талбайд Хятадын өнцөг булан бүрээс ирсэн 900 гаруй томоохон аж ахуйн нэгж, шинжлэх ухаан, технологийн хүрээлэнгүүд оролцсон түүхэн том цар хүрээтэй арга хэмжээ болов.
Монголын бизнес эрхлэгчдийн хувьд тус үзэсгэлэнд оролцсоноор газар тариалангийн салбарын хамгийн сүүлийн үеийн дэвшилтэт техник хэрэгсэл, ухаалаг усалгааны систем, үр тарианы шинэ сортууд болон хөрс хамгааллын инновацЫн шийдлүүдтэй газар дээр нь танилцах боломж бүрдсэн юм.
МҮХАҮТ-ын зүгээс үзэсгэлэнгийн үеэр Өвөрмонголын газар тариалан, мал аж ахуйн салбарын тэргүүлэгч компаниудтай B2B уулзалтуудыг амжилттай зохион байгуулж, хоёр орны бизнес эрхлэгчид технологийн шинэчлэл, бүтээгдэхүүн хөгжүүлэлт болон харилцан туршлага солилцох өргөн хүрээний хэлэлцүүлгүүдийг өрнүүллээ.
Мөн бизнес аяллын бүрэлдэхүүнд багтсан төлөөлөгчид малын бордоо, хүлэмжийн аж ахуй, усны тоног төхөөрөмж үйлдвэрлэл, үнээний ферм болон сүүний инновац хөгжлийн төвийн үйл ажиллагаатай танилцаж, бүс нутгийн хөдөө аж ахуйн кластер хөгжлийн загварыг судалсан байна.
Энэхүү үзэсгэлэн нь зөвхөн бараа бүтээгдэхүүн сурталчлах бус, малын тэжээл үйлдвэрлэл болон ухаалаг хөдөө аж ахуйн чиглэлээр Хятадын шилдэг компаниудтай бизнесийн шинэ түншлэл тогтоох, Монгол Улсын хөдөө аж ахуйн салбарт орчин үеийн стандартыг нэвтрүүлэх бодит алхам боллоо.
