МОНГОЛ УЛСЫН ТӨЛӨӨЛӨГЧИД ДЭЛХИЙН ХУДАЛДААНЫ САЙД НАРЫН 14 ДҮГЭЭР ЧУУЛГА УУЛЗАЛТЫН ХҮРЭЭНД ЗОХИОН БАЙГУУЛАГДСАН “ЭМЭГТЭЙЧҮҮД БА ХУДАЛДАА” САЛБАР ХУРАЛДААНД ОРОЛЦЛОО
Бүгд Найрамдах Камерун Улсын нийслэл Яундэ хотноо зохион байгуулагдсан Дэлхийн худалдааны сайд нарын 14 дүгээр чуулга уулзалтын хүрээнд Дэлхийн худалдааны байгууллага болон Олон улсын худалдааны төв хамтран зохион байгуулсан “Эмэгтэйчүүд ба Худалдаа” салбар хуралдаанд Монгол Улсын төлөөлөгчид амжилттай оролцлоо. Тус хуралд Швейцарын Холбооны Улсад суугаа Онц бөгөөд Бүрэн эрхт Элчин сайд Д.Гэрэлмаа, МҮХАҮТ-ын Төсөл, хөтөлбөрийн газрын дарга А.Энэрэл болон “Цахим эдийн засаг дахь эмэгтэй экспортлогчдыг дэмжих төсөл”-ийн оролцогч, “Анааш” брэндийн захирал Б.Анхмаа нар оролцож, эмэгтэй бизнес эрхлэгчдийн олон улсын худалдаанд оролцоог нэмэгдүүлэх чиглэлээр туршлага, санал солилцов.
Хуралдааны үеэр дэлхийн дөрвөн улсад хэрэгжиж буй “WEIDE” сан төслийн үр дүн, “SheTrades” санаачилга, мөн худалдаа дахь жендерийн тэгш байдлыг дэмжих механизмын талаарх танилцуулгыг хийсэн юм. Мөн “100 WEIDE Women Said” интерактив тэмцээн зохион байгуулагдаж, дөрвөн улсын багууд эмэгтэйчүүдийн цахим худалдааны туршлага, тулгамдаж буй асуудлуудын талаарх санал асуултын хамгийн түгээмэл хариултыг таах замаар өрсөлдсөн бөгөөд Монгол Улс бизнес эрхлэгч эмэгтэйчүүдэд тулгардаг сорилт, гарц шийдлүүдийг хамгийн оновчтой тодорхойлж оролцлоо.
МҮХАҮТ-ын Төсөл, хөтөлбөрийн газрын дарга А.Энэрэл хэлэлцүүлгийн явцад Монголын бизнес эрхлэгч эмэгтэйчүүдийн чадавхыг бэхжүүлэх, тэднийг олон улсын төсөл хөтөлбөртэй холбох чиглэлээр танхимаас хэрэгжүүлж буй бодлого, үйл ажиллагааг танилцуулж, цаашид экспортын чиг баримжаатай жижиг, дунд үйлдвэрлэлийг дэмжихэд олон улсын хамтын ажиллагаа чухал болохыг онцлов. Энэхүү оролцоо нь Монголын эмэгтэй бизнес эрхлэгчдийн эдийн засгийн оролцоог нэмэгдүүлэх, экспорт, цахим худалдааны чиглэлээрх туршлагаа олон улсын түвшинд таниулах чухал алхам боллоо.
Гэрэл зургийг www.wto.org сайтаас ашигласан болно.
