ЭМЭГТЭЙ БИЗНЕС ЭРХЛЭГЧДИЙГ БОДЛОГООР ДЭМЖИЖ, ОЛОН УЛСЫН ТӨСӨЛ ХӨТӨЛБӨРҮҮДТЭЙ ХАМТЫН АЖИЛЛАГААГАА ӨРГӨЖҮҮЛНЭ
МҮХАҮТ-ын дэргэдэх Бизнес эрхлэгч эмэгтэйчүүдийн зөвлөлийн 2026 оны ээлжит хуралд гишүүд танхимаар болон орон нутгаас цахимаар идэвхтэй оролцож, ирэх оны үйл ажиллагааны ерөнхий төлөвлөгөөгөө албан ёсоор баталлаа.
Тус зөвлөл энэ онд хууль эрх зүй, бодлогын өмгөөллийг идэвхжүүлэх, олон улсын төсөл хөтөлбөрүүдтэй хамтын ажиллагаагаа өргөжүүлэх төдийгүй эмэгтэй бизнес эрхлэгчдэд зориулсан бүсчилсэн арга хэмжээг шат дараатай зохион байгуулахаар тусгасан байна.
Хурлын үеэр МҮХАҮТ-ын Ерөнхий нарийн бичгийн дарга Б.Саруул танхимын зүгээс хэрэгжүүлэх бодлогын ажлуудад эмэгтэйчүүдийн зөвлөл хэрхэн оролцох, хамтран ажиллах боломжуудыг танилцуулсан юм.
Мөн Европын холбооны санхүүжилттэй ITDM төслийн эксперт Карл Круг болон Монголын Экспортын Кластерын Сүлжээ ТББ-ын УЗ-ийн гишүүн Х.Ариунгоо нар оролцож, экспортыг дэмжих төслүүд болон кластерын тогтолцооны давуу талуудын талаар мэдээлэл өгч, хамтын ажиллагааны шинэ гарцуудыг хэлэлцлээ.
МҮХАҮТ-ын УЗ-ийн гишүүн, “Жүр Үр” ХХК-ийн Гүйцэтгэх захирал Б.Мөнхзулын удирддаг тус зөвлөл нь бизнес эрхлэгч эмэгтэйчүүдийн эрх ашгийг хамгаалах, чадавхжуулах, харилцан туршлага солилцох нетворкинг үүсгэхэд чиглэсэн нээлттэй платформ болон үйл ажиллагаагаа тэлсээр байна.
Танхимын гишүүн бизнес эрхлэгч эмэгтэй бүрт тус зөвлөлийн үйл ажиллагаа нээлттэй бөгөөд сургалт мэдээлэл, бодлогын дэмжлэг авах боломжтой юм.
