МҮХАҮТ БОЛОН CACCI-ИЙН ХАМТАРСАН ВЕБИНАРААР БҮС НУТГИЙН БИЗНЕСИЙН ТҮНШЛЭЛИЙН ТАЛААР САНАЛ СОЛИЛЦЛОО
Монголын Үндэсний Худалдаа Аж Үйлдвэрийн Танхим (МҮХАҮТ) болон Ази, Номхон далайн Худалдаа, Аж Үйлдвэрийн Танхимуудын Холбоо (CACCI) хамтран Монгол Улсын эдийн засаг, бизнесийн орчин болон хөрөнгө оруулалтын боломжуудыг танилцуулах вебинарыг амжилттай зохион байгууллаа.
Тус вебинарт бүс нутгийн гишүүн танхимууд, бизнес эрхлэгчид, хөрөнгө оруулагчид болон олон улсын байгууллагын төлөөллүүд өргөнөөр оролцож, Монгол Улсын зах зээлийн өнөөгийн нөхцөл байдал, цаашдын хөгжлийн чиг хандлагын талаар мэдээлэл авлаа.
Вебинарын зочин илтгэгчээр МҮХАҮТ-аас жил бүр шалгаруулдаг CACCI Awards-ийн 2025 оны эзэн Мобиком корпорацийн Стратегийн асуудал хариуцсан Захирал Б.Үнэнбат оролцож, Монгол Улсад хүртээмжтэй дижитал дэд бүтцийг хэрхэн бий болгон хөгжүүлж буй бодит туршлага, хэрэгжүүлж буй шийдлүүдийн талаар дэлгэрэнгүй танилцуулга хийлээ. Тэрээр мөн хөгжиж буй зах зээлд дижитал шилжилтийг амжилттай хэрэгжүүлэхэд тулгарч буй сорилт, боломжуудын талаар сонирхолтой мэдээлэл хуваалцсан юм.
Мөн МҮХАҮТ-ын Ерөнхийлөгч Б,Лхагважав онлайн мэндчилгээ дэвшүүлж, Ерөнхий нарийн бичгийн дарга Б.Саруул Монгол Улсын эдийн засгийн өнөөгийн нөхцөл байдал, бизнесийн орчны онцлог, хөрөнгө оруулалтын боломжуудыг танилцуулж, Монгол Улс болон Зүүн өмнөд Азийн орнуудын хооронд худалдааны эргэлтийг нэмэгдүүлэх боломжтой тэргүүлэх салбаруудыг онцлон дурдлаа. Тэрээр бүс нутгийн хамтын ажиллагааг өргөжүүлэх, бизнесийн түншлэлийг бэхжүүлэх нь цаашдын эдийн засгийн өсөлтөд чухал хувь нэмэр оруулна гэдгийг тэмдэглэв.
Тус вебинар нь Монгол Улсын дижитал хөгжлийн ахиц дэвшил, бизнесийн орчны боломж, бүс нутгийн худалдааны хамтын ажиллагааны чиг хандлагыг олон улсын бизнесийн хамтын нийгэмлэгт таниулахад чухал ач холбогдолтой, үр өгөөжтэй арга хэмжээ болж өндөрлөлөө. CACCI нь Ази, Номхон далайн бүс нутгийн худалдаа, аж үйлдвэрийн танхимуудыг нэгтгэсэн олон улсын байгууллага бөгөөд гишүүн орнуудын бизнесийн хамтын ажиллагаа, худалдаа, хөрөнгө оруулалтыг дэмжих зорилготой байгууллага юм.
