МҮХАҮТ-ЫН ТӨЛӨӨЛӨЛ "АЗИЙН ТӨЛӨӨХ БОАО ФОРУМ 2026 "-Д ОРОЛЦОЖ БАЙНА
БНХАУ-ын Хайнань мужийн Боао хотноо 2026 оны 3 дугаар сарын 24-нөөс 27-ны өдрүүдэд зохион байгуулагдаж буй Азийн төлөөх БОАО форумд МҮХАҮТ-ыг төлөөлөн Ерөнхийлөгч Б.Лхагважав болон МҮХАҮТ-ын БНХАУ дахь Төлөөлөгчийн газрын тэргүүн, Гүйцэтгэх захирал О.Амарболд нар оролцож байна.
Дэлхий нийтэд “Азийн Давос” хэмээн алдаршсан тус форум нь бүс нутгийн эдийн засгийн хамтын ажиллагаа, хөгжлийн чиг хандлагыг тодорхойлох олон улсын нэр хүндтэй индэр бөгөөд энэ жил байгуулагдсаны 25 жилийн ой нь тохиож байгаагаараа онцлог юм.
МҮХАҮТ нь тус форумын анхны (initial) гишүүн байгууллагуудын нэг бөгөөд ойн арга хэмжээнд ийнхүү хүндэт зочноор оролцож байгаа нь Монгол Улсын бизнесийн байгууллагын бүс нутгийн түвшний оролцоо, байр суурийг дахин бататгасан чухал үйл явдал болж байна.
Энэ жилийн чуулга уулзалт “Хамтын ирээдүйг бүтээе: Шинэ динамик, шинэ боломж, шинэ хамтын ажиллагаа” уриан дор өрнөж, дэлхийн нийлүүлэлтийн сүлжээний өөрчлөлт, дижитал шилжилт, хиймэл оюун ухаан, ногоон хөгжил болон тогтвортой өсөлтийн асуудлуудыг голлон хэлэлцэж байна. Түүнчлэн форумын хөтөлбөрт багтсан чөлөөт худалдааны бүс, боомтын хөгжлийг дэмжих асуудлууд нь МҮХАҮТ-ын үндсэн чиг үүрэг болох гадаад худалдаа, бизнесийн орчныг дэмжих бодлоготой шууд уялдаж байгаа юм.
Форумын хүрээнд МҮХАҮТ-ын төлөөлөгчид БНХАУ болон Азийн орнуудын төр, бизнесийн байгууллагуудтай ажил хэргийн уулзалтууд хийж байна. Эдгээр уулзалтаар Монгол Улс руу чиглэх хөрөнгө оруулалтыг нэмэгдүүлэх, экспортын хамтын ажиллагааг өргөжүүлэх болон үндэсний аж ахуйн нэгжүүдийг олон улсын зах зээлд гарахад нь дэмжлэг үзүүлэх асуудлыг голчлон хэлэлцэж байна.
