МҮХАҮТ БОЛОН АХБ БИЗНЕСИЙН ОРЧНЫ ЭРХ ЗҮЙН ШИНЭЧЛЭЛИЙН АСУУДЛААР САНАЛ СОЛИЛЦЛОО
МҮХАҮТ болон Азийн Хөгжлийн Банкны төлөөлөгчидтэй уулзаж, Монгол Улсын бизнесийн болон хөрөнгө оруулалтын орчныг сайжруулахад чиглэсэн хууль эрх зүй, бодлогын шинэчлэлийн тэргүүлэх чиглэлүүдийн талаар дэлгэрэнгүй санал солилцлоо. Уулзалтаар талууд гадаадын шууд хөрөнгө оруулалтын эрх зүйн баталгааг хангах, хөрөнгө оруулагчдын итгэлийг сэргээхэд чиглэсэн тогтвортой орчныг бүрдүүлэх асуудлыг голчлон хэлэлцсэн юм.
МҮХАҮТ-ын зүгээс хувийн хэвшлийн эрх ашгийг хамгаалах, бизнесийн таатай нөхцөлийг бий болгоход олон улсын санхүүгийн байгууллагуудтай нягт хамтран ажиллах нь стратегийн ач холбогдолтойг онцлоод, төр болон хөрөнгө оруулагчдын хоорондын уялдаа холбоог сайжруулахад АХБ-ны техникийн туслалцаа, зөвлөх үйлчилгээ чухал үүрэгтэйг тэмдэглэв.
АХБ-ны төлөөлөгчид өөрсдийн хэрэгжүүлж буй “Хууль болон бодлогын шинэчлэл” (LPR) хөтөлбөрийнхөө хүрээнд засаглалыг сайжруулах, олон улсын гэрээ хэлэлцээрийг орчин үеийн стандартад нийцүүлэн шинэчлэхэд дэмжлэг үзүүлэх боломжтойг танилцууллаа. Ялангуяа бизнесийн маргааныг шүүхийн бус замаар, шуурхай шийдвэрлэх эвлэрүүлэн зуучлах болон арбитрын тогтолцоог бэхжүүлэх нь бизнесийн зардлыг бууруулах, цаг хугацаа хэмнэхэд нэн шаардлагатай байгааг талууд санал нэгтэй хүлээн зөвшөөрөв.
Мөн Монгол Улс НҮБ-ын Цөлжилттэй тэмцэх конвенцын Талуудын 17 дугаар бага хурлыг (COP17) зохион байгуулах бэлтгэл ажлын хүрээнд "Ногоон санхүүжилт" болон байгальд ээлтэй бизнесүүдийг дэмжих бодлогын талаар өргөн хүрээнд санал солилцсон байна. МҮХАҮТ-ын зүгээс татвар, эдийн засгийн эрх чөлөө, төлбөрийн чадваргүй байдлын тухай хуулийн шинэчлэл зэрэг асуудлаар хувийн хэвшлийн бодит байр суурийг бодлого боловсруулах түвшинд хүргэж, аливаа шинэчлэл нь бизнест дарамт болохгүй, хэрэгжихүйц байхад анхаарч байгаагаа илэрхийллээ. Уулзалтын төгсгөлд талууд цаашид хамтарсан хэлэлцүүлэг, мэдлэг хуваалцах платформуудыг тогтмолжуулж, хуулийн шинэчлэлд бизнесийнхний дуу хоолойг бодитой тусгахад нягт хамтран ажиллахаар тохиролцлоо.
