НАЛАЙХЫН ПОЛИТЕХНИК КОЛЛЕЖ ТӨР, ХУВИЙН ХЭВШЛИЙН ТҮНШЛЭЛИЙГ БЭХЖҮҮЛЭХ ӨДӨРЛӨГ ЗОХИОН БАЙГУУЛАВ

Налайх дүүрэг дэх политехник коллежоос “Орон нутагт хосмог сургалтыг хэрэгжүүлэх, төр хувийн хэвшлийн түншлэлийн тогтолцоог бэхжүүлэх нээлттэй өдөрлөг, сургалт”-ыг амжилттай зохион байгууллаа. Энэхүү арга хэмжээ нь сургалтын байгууллага болон ажил олгогчдын хамтын ажиллагааг шинэ шатанд гаргах, хосмог сургалтын тогтолцоог орон нутагт дэлгэрүүлэхэд чиглэгдсэн бөгөөд Германы хамтын ажиллагааны нийгэмлэг, МҮХАҮТ, Дүүргийн ХХҮГ болон Боловсролын хэлтсийн дэмжлэгтэйгээр өрнөсөн юм.

Өдөрлөгт уул уурхай, эрчим хүч, авто замын салбарын тэргүүлэх аж ахуйн нэгжүүд болох “Трансвест Монголиа”, “Эм Эс Эм групп”, “Энержи Ресурс”, “Монголын Алт МАК”, “Монполимет групп”, “ДЦС-3” зэрэг нийт 16 томоохон компани, байгууллагын төлөөлөл оролцлоо. Оролцогчид хосмог сургалтын арга зүй, мэргэжлийн зөвлөлийн үйл ажиллагааны талаар дэлгэрэнгүй мэдээлэл авч, харилцан туршлага солилцсон нь онол, практик хосолсон сургалтын үр өгөөжийг нэмэгдүүлэхэд чухал ач холбогдолтой болов.

Сургалтын үеэр МҮХАҮТ-ын Бизнес академийн захирал Д.Бямбадорж хөдөлмөрийн зах зээлийн өнөөгийн нөхцөл байдал, хөдөлмөр эрхлэлтийг дэмжих бодлогын талаар танилцуулсан бол ахлах мэргэжилтэн С.Оюунсүрэн танхим болон Мэргэжлийн зөвлөлийн хамтын ажиллагааны механизмын талаар илтгэл тавьж, оролцогчдын сонирхсон асуултад хариулт өгсөн юм.

Ийнхүү төр, хувийн хэвшил, сургалтын байгууллагууд нэг дор цуглаж, мэргэжилтэй боловсон хүчнийг ажлын байран дээр нь сургаж бэлтгэх хосмог тогтолцоог бэхжүүлэх гарц шийдлүүдийг хэлэлцлээ.