БИЗНЕСИЙН ТӨЛӨӨЛЛҮҮД СОЛОНГОСЫН ЭРҮҮЛ МЭНДИЙН САЛБАРЫН ДЭВШИЛТЭТ ТЕХНОЛОГИТОЙ ТАНИЛЦЛАА
БНСУ-ын Сөүл хотноо 2026 оны 3 дугаар сарын 18-наас 23-ны өдрүүдэд эрүүл мэндийн салбарын техник технологийн дэвшлийг тодорхойлогч 41 дэх удаагийн “Олон улсын эмнэлэг, эмнэлгийн тоног төхөөрөмжийн үзэсгэлэн” буюу KIMES 2026 зохион байгуулагдаж байгаа бөгөөд тус арга хэмжээнд МҮХАҮТ-аас бизнесийн төлөөллүүдийг нэгтгэсэн тусгай групп бүрдүүлэн амжилттай оролцож байна.
Тус бүрэлдэхүүнд МҮХАҮТ-ын гишүүн байгууллага Мегатитан, Айр Транс, Монголын хувийн хэвшлийн эрүүл мэндийн байгууллагын холбоо, Альтернатив эмнэлэг, Топаз эмнэлэг, Зонне интернэшнл эмнэлэг, Саруул оч, Мөнхийн тун болон Хустайн Хянган зэрэг салбартаа тэргүүлэгч аж ахуйн нэгжүүдийн удирдлага, төлөөллүүд оролцон туршлага судлаж байна.
Уг үзэсгэлэн нь Солонгосын хамгийн сүүлийн үеийн эмнэлгийн тоног төхөөрөмж, дэвшилтэт технологийг эмнэлгийн бодит орчинд хэрхэн үр дүнтэй ашиглаж байгааг шууд ажиглаж, туршлага судлах өргөн боломжийг олгож буйгаараа онцлог болж байна.
МҮХАҮТ-аас БНСУ-ын Just Verify байгууллагын баталгаажуулалтын дарга James Shin-тай хамтран тус улсын томоохон эмнэлэгүүд болох Ain Hospital нэгдсэн эмнэлэг, Gangnam Grand Eye нүдний эмнэлэг, Pascal Clinic болон Change Clinic гоо сайхны мэс заслын эмнэлэгүүдийн үйл ажиллагаатай газар дээр нь танилцаж, Солонгос-Монголын эрүүл мэндийн байгууллагуудын цаашдын хамтын ажиллагааны талаар санал солилцлоо.
Нэг өдрийн танилцах аяллын хүрээнд төлөөлөгчид эмнэлгийн байр, орчин үеийн тоног төхөөрөмжийн шийдэл, өвчтөнд төвлөрсөн эрүүл мэндийн удирдлагын тогтолцоотой нарийвчлан танилцсанаас гадна хоёр орны эрүүл мэндийн салбарын мэдлэг туршлагыг харилцан солилцох, стратегийн түншлэлийг шинэ шатанд гаргах боломжуудыг албан ёсоор судалсан үр дүнтэй арга хэмжээ боллоо.
