ЧӨЛӨӨТ ХУДАЛДААНЫ ХЭЛЭЛЦЭЭР НЬ БИЗНЕСИЙН ТҮНШЛЭЛИЙН ШИНЭ ГАРЦ БОЛНО
Монгол, Казахстаны бизнес форумын хүрээнд Бүгд Найрамдах Казахстан Улсын Худалдаа, интеграцийн яамны Тэргүүн дэд сайд Айжан Бижанова хоёр улсын аж ахуйн нэгжүүдийн төлөөлөлтэй ажил хэргийн уулзалт хийж, эдийн засгийн хамтын ажиллагааны шинэ боломжуудыг нээлээ.
Уулзалтын эхэнд Тэргүүн дэд сайд хоёр улсын худалдааны эргэлтийг ойрын хугацаанд 500 сая ам.долларт хүргэх стратегийн зорилт тавьж буйгаа онцолж, үүнд хүрэхэд Казахстан улсын зүгээс нэмүү өртөг шингэсэн 100 гаруй нэр төрлийн бараа бүтээгдэхүүнийг Монголын зах зээлд нийлүүлэх, экспортын даатгал болон санхүүжилтийн уян хатан нөхцөлийг санал болгоход бэлэн байгаагаа илэрхийлсэн юм. Тэрээр ялангуяа хүнс, барилгын материал, металлурги болон химийн үйлдвэрлэлийн салбарт түншлэлийг идэвхжүүлэх сонирхолтой байгаагаа дурдаад, Монгол Улс болон Евразийн эдийн засгийн холбоо хооронд байгуулагдах Түр зуурын чөлөөт худалдааны хэлэлцээр нь 370 гаруй нэр төрлийн барааг татваргүй нэвтрүүлэх түүхэн боломж болохыг тэмдэглэв.
Бизнес эрхлэгчдийн зүгээс тавьсан тээвэр логистикийн хүндрэл болон тарифын бус саад тотгорын талаарх асуултуудад А.Бижанова дэлгэрэнгүй хариулт өгөхдөө Орос, Хятадаар дамжин өнгөрөх тээврийн коридорыг оновчтой болгох, агаарын тээврийн давтамжийг нэмэгдүүлэх чиглэлээр хоёр улсын Засгийн газар бодлогын түвшинд нягт ажиллаж байгааг онцоллоо. Мөн Монголын компаниудад хандан Казахстаны "QazTrade" экспортын дэмжлэгийн төв болон санхүүгийн институтуудтай шууд холбогдож, хамтарсан төсөл хэрэгжүүлэх бүрэн боломжтойг хэлээд, стандарт болон чанарын баталгааг олон улсын түвшинд уялдуулах нь бизнест саад биш, харин итгэлцлийн гүүр болох ёстойг дурдсан юм.
