ТӨРИЙН АЙЧЛАЛЫН ХҮРЭЭНИЙ БИЗНЕС ФОРУМУУД, ГАДААД ХАМТЫН АЖИЛЛАГАА БА БОДИТ ҮР ДҮН УУЛЗАЛТ ХЭЛЭЛЦҮҮЛЭГ БОЛЛОО
Монгол Улсын Ерөнхийлөгч У.Хүрэлсүхийн гадаад улс орнуудад хийсэн төрийн айчлалууд нь дипломат харилцаанаас гадна үндэсний бизнес эрхлэгчдийг дэлхийн зах зээлд хөтлөх томоохон гүүр болсныг МҮХАҮТ-аас онцолж байна. Тухайлбал, 2025 оны хугацаанд Турк, Чех, Польш, Киргизстан, Тажикистан, Энэтхэг болон Итали зэрэг долоон улсад зохион байгуулагдсан бизнес форумууд нь эдийн засгийн хамтын ажиллагааг бодит ажил хэрэг болгох чухал платформ боллоо.
МҮХАҮТ-ын Ерөнхийлөгч Б.Лхагважав арга хэмжээний нээлтийн үеэр хэлсэн үгэндээ, төрийн өндөр хэмжээний айлчлалын хүрээнд өрнөж буй эдгээр форум нь бизнесийн байгууллагуудын шууд харилцааг өргөжүүлэх, хөрөнгө оруулалт болон худалдааны шинэ боломжийг нээхэд шийдвэрлэх үүрэг гүйцэтгэж байгааг тэмдэглээд, цаашид форумын бодит үр нөлөөг үнэлж, илүү оновчтой төлөвлөх нь чухал болохыг онцлов.
Эдгээр форумын хүрээнд Монголын аж ахуйн нэгжүүд гадаадын түншүүдтэйгээ шууд харилцаа тогтоож, Чех улсад 6.3 сая доллар, Польш улсад 8 сая еврогийн үнийн дүнтэй худалдааны гэрээнүүдийг амжилттай үзэглэсэн нь манай экспортын чадавхыг илтгэж байна.
Танхимын зүгээс бизнес аялалд оролцогчдын дунд явуулсан сэтгэл ханамжийн судалгаагаар нийт оролцогчдын дийлэнх нь эдгээр арга хэмжээг маш өндөр үр өгөөжтэй гэж үнэлсэн бөгөөд судалгаанд оролцогчдын 59.6 хувь нь шинэ түнштэй танилцсан бол тал гаруй хувь нь бизнесийн шинэ санаа, инновацийг эх орондоо нэвтрүүлэх боломжийг олж харсан байна.
Ялангуяа хүнс, хөнгөн үйлдвэр, ноос ноолуурын салбарынхан энэхүү бизнес аялалд хамрагдсанаар олон улсын стандартад нийцсэн түншлэл тогтоож, Италийн "SIMEST", "UNIC" зэрэг нэр хүндтэй байгууллагуудтай хамтын ажиллагааны санамж бичиг байгуулсан нь салбарын хөгжилд шинэ түлхэц боллоо.
Цаашид МҮХАҮТ-ын зүгээс төрийн айлчлалын хүрээнд зохион байгуулагдах бизнес арга хэмжээнүүдийг илүү оновчтой, хүртээмжтэй болгоход анхаарч, байгуулагдсан гэрээ, хэлэлцээрийн хэрэгжилтийг бодитоор дэмжин ажиллахаар төлөвлөж байна. Энэхүү судалгааны үр дүн болон бизнес форумуудын амжилт нь Монгол Улсын бизнес эрхлэгчид дэлхийн тавцанд өрсөлдөх бүрэн боломжтойг баталж байгаа бөгөөд Танхимын зүгээс төр, хувийн хэвшлийн түншлэлийг бэхжүүлж, гадаад зах зээлд гарах замыг улам бүр өргөжүүлэн ажиллах юм.
