ЛАБОРАТОРИУДЫН ТОГТОЛЦООГ ШИНЭЧЛЭХЭД ТӨР, ХУВИЙН ХЭВШИЛ ХАМТАРЧ АЖИЛЛАНА
Монгол Улсын Шадар сайдын Ажлын албаны дарга бөгөөд ахлах зөвлөх А.Даваажаргал, зөвлөх Ж.Чойханд нар /2026.03.10/ МҮХАҮТ-ын Гүйцэтгэх захирал Ц.Магнайбаатар болон Танхимын дэргэдэх Итгэмжлэгдсэн лабораториудын зөвлөлийн бүрэлдэхүүнийг хүлээн авч уулзлаа. Уулзалтаар Монгол Улсын Засгийн газар, Шадар сайдын зүгээс лабораторийн салбарын бодлого, эрх зүйн орчныг шинэчлэх, "Лабораторийн тухай" бие даасан хуулийг санаачлан боловсруулж байгаа тухай болон итгэмжлэгдсэн лабораториудын өнөөгийн байдал, стандартын хэрэгжилтэд тулгамдаж буй асуудлуудын талаар дэлгэрэнгүй санал солилцов.
МҮХАҮТ-ын Гүйцэтгэх захирал Ц.Магнайбаатар уулзалтын үеэр хувийн хэвшлийн лабораториудад тулгарч буй бодит сорилтуудыг хөндөж, салбарын эрх зүйн шинэчлэлд Танхимын оролцоо болон хувийн хэвшлийн дуу хоолойг тусгах нь ач холбогдолтойг онцлон саналаа хэллээ. Тэрээр лабораторийн салбарт бизнес эрхлэх таатай орчныг бүрдүүлэх, зах зээлийн өрсөлдөөний зарчмаар үйл ажиллагааг нь жигдрүүлж, төр-хувийн хэвшлийн бодит түншлэлийг бэхжүүлэх шаардлагатайг тэмдэглэв.
УИХ-ын хаврын чуулганд “Стандартчилал, техникийн зохицуулалт, тохирлын үнэлгээний итгэмжлэлийн тухай” хуулийн шинэчилсэн найруулгын төсөлд лабораторийн асуудлыг тусдаа бие даасан бүлэг болгон оруулахаар бэлтгэж байгаа бөгөөд энэ нь мэдээллийн нэгдсэн санг бүрдүүлэх, лавлагаа шатны лабораторийн чиг үүргийг тодорхой болгох ач холбогдолтойг Шадар сайдын Ахлах зөвлөх А.Даваажаргал онцоллоо.
Мөн өнөөдрийн байдлаар хүнсний аюулгүй байдлын хяналт хязгаарлагдмал байгаагаас гадна олон улсын жишигт нийцсэн нарийн шинжилгээнүүд болох бичил хуванцар, будагч бодис, удаан нөөшлөгчийг илрүүлэх чадамж дутмаг байгаа нь хүн амын эрүүл мэндэд эрсдэл учруулж байгаад талууд санал нэгдэв.
Мөн уулзалтын үеэр Итгэмжлэгдсэн лабораториудын зөвлөлийн дарга М.Энхмандах лабораториудын чадавхыг сайжруулах, олон улсад хүлээн зөвшөөрөгдөх байдлыг нэмэгдүүлэхэд төрөөс бодлогын дэмжлэг нэн шаардлагатай байгааг онцлов. Тэрээр лабораторийн салбарын эрх зүйн орчныг шинэчилснээр дотоодын лабораториуд техникийн хүчин чадлаа нэмэгдүүлэх, мэргэшсэн боловсон хүчнийг тогтвортой ажиллуулах, улмаар хэрэглэгчдэд очиж буй бүтээгдэхүүний чанар, аюулгүй байдлын баталгааг шинжлэх ухааны үндэслэлтэйгээр чангатгах боломж бүрдэхийг тэмдэглэлээ.
Хуулийн төслийн боловсруулалтад Танхимын дэргэдэх Итгэмжлэгдсэн лабораториудын зөвлөл болон хувийн хэвшлийн төлөөлөл, олон улсын болон дотоодын зөвлөхүүдийг оролцуулж, илүү боловсронгуй эрх зүйн орчинтой болох ажилд хамтарч ажиллахаар тогтов.
