МҮХАҮТ-ЫН "НЭЭЛТТЭЙ ӨДРҮҮД" АРГА ХЭМЖЭЭГЭЭР ГАДААД ХУДАЛДАА, ХӨРӨНГӨ ОРУУЛАЛТ БА ESG-ИЙН ЦОГЦ ШИЙДЛҮҮДИЙГ ТАНИЛЦУУЛЛАА
МҮХАҮТ, Эдийн засаг, хөгжлийн яамтай хамтран бизнес эрхлэгчдийг дэмжих, төр-хувийн хэвшлийн түншлэлийг шинэ шатанд гаргах зорилгоор "Хөрөнгө оруулагчийн эрх ашгийг хамгаалах төв"-д гурван өдрийн турш зохион байгуулсан "Нээлттэй өдрүүд" арга хэмжээ амжилттай өндөрлөлөө.
Энэхүү арга хэмжээ нь дотоодын аж ахуйн нэгжүүдэд гадаад зах зээлд өрсөлдөх боломжийг нээж өгөх, хөрөнгө оруулалтын эрх зүйн орчныг таниулах, улмаар орчин үеийн бизнесийн чиг хандлага болох ESG стандартыг үйл ажиллагаандаа хэрхэн нэвтрүүлэх талаар практик мэдлэг олгосон ач холбогдолтой үйл ажиллагаа болов.
Арга хэмжээний эхний өдөр экспорт, гадаад худалдааны боломжуудад төвлөрсөн бөгөөд Монгол Улс болон Евразийн эдийн засгийн холбоо хоорондын худалдааны түр хэлэлцээрийн хүрээнд нээгдэж буй шинэ гарцуудыг онцлон хэлэлцлээ. Түүнчлэн Европын холбооны "Бүртгэгдсэн экспортлогчийн систем" (REX) болон Хөнгөлөлтийн ерөнхий систем (GSP+)-ийг ашиглан татваргүй экспорт хийх арга замуудыг дэлгэрэнгүй танилцуулсан юм. Бизнес эрхлэгчдэд нэн шаардлагатай Барааны ангиллын код (БТКУС), гарал үүслийн гэрчилгээний ач холбогдол болон давагдашгүй хүчин зүйл, шинжээчийн экспертизийн үйлчилгээний талаарх мэдээллүүд нь экспорт, импортын үйл ажиллагааг эрсдэлгүй явуулахад чухал чиглүүлэг боллоо.
Үргэлжлүүлэн хоёр дахь өдөр хөрөнгө оруулагчдын эрх ашгийг хамгаалах болон гадаад худалдааны гэрээ хэлцлийн эрх зүйн асуудлуудыг хөндөв. Эдийн засаг, хөгжлийн яамнаас хөрөнгө оруулалтын бодлогын талаар мэдээлэл өгсөн бол Монголын Олон Улсын Арбитраас гадаад худалдааны гэрээ байгуулахад анхаарах нийтлэг алдаа, эрсдэлээс сэргийлэх арга замыг практик жишээн дээр тайлбарлалаа. Ялангуяа хөрөнгө оруулалтын маргааныг арбитраар шийдвэрлэх давуу тал, арбитрын шийдвэрийг хүлээн зөвшөөрч биелүүлэх олон улсын зохицуулалтын талаарх хэлэлцүүлэг нь бизнес эрхлэгчдэд өөрсдийн эрх ашгаа хууль ёсны дагуу хэрхэн хамгаалах итгэлийг өгсөн юм.
Арга хэмжээний төгсгөлийн өдөр "Хариуцлагатай бизнес ба ESG" сэдвийн дор өрнөж, тогтвортой хөгжлийн зорилтуудыг бизнесийн стратегитай хэрхэн уялдуулах талаар нэгдсэн ойлголтод хүрлээ. ESG буюу байгаль орчин, нийгэм, засаглалын шалгуур үзүүлэлтүүд нь олон улсын зах зээлээс санхүүжилт болон хөрөнгө оруулалт татахад гол хэмжүүр болж байгааг онцолсон юм. Инвескор ББСБ, Ханбогд кашимер, Тесо Групп зэрэг үндэсний тэргүүлэх компаниуд өөрсдийн сайн туршлагаа хуваалцаж, ESG-ийг хэрэгжүүлснээр компанийн үнэ цэн болон үр ашиг хэрхэн нэмэгддэгийг бодит жишээгээр харууллаа.
Гурван өдрийн турш үргэлжилсэн энэхүү "Нээлттэй өдрүүд" нь бизнес эрхлэгчдэд зөвхөн мэдээлэл өгөөд зогсохгүй, Танхимын зүгээс үзүүлдэг үйлчилгээг нэг дороос авах бодит боломжийг олгосон үр дүнтэй арга хэмжээ боллоо.
