МОНГОЛЫН БИЗНЕСҮҮД ESG СТАНДАРТЫГ НУТАГШУУЛЖ ЭХЭЛЛЭЭ
МҮХАҮТ болон Эдийн засаг, хөгжлийн яам хамтран зохион байгуулж буй "Нээлттэй өдрүүд" арга хэмжээний хүрээнд өнөөдөр "Хариуцлагатай бизнес ба ESG" сэдэвт сургалт, хэлэлцүүлэг амжилттай зохион байгуулагдав.
Арга хэмжээний эхний хэсэгт бизнесийн байгууллагуудад ESG стандартууд яагаад чухал болох, түүнийг нэвтрүүлэх шаардлагын талаар экспертүүд байр сууриа илэрхийллээ.
МҮХАҮТ-ын Ерөнхийлөгчийн зөвлөх М.Сарандаваа "Бизнест ESG яагаад чухал вэ?" сэдвээр илтгэл тавьж, орчин үеийн бизнесийн амжилт нь зөвхөн ашгаар бус, нийгэм болон байгаль орчинд үзүүлж буй нөлөөллөөр хэмжигдэх болсныг онцлон тэмдэглэв.
Түүнчлэн, Блакрок Партнерс ХХК-ийн захирал Г.Сурахбаяр ESG-ийн зах зээлийн судалгааны үр дүнг танилцуулж, олон улсын зах зээл болон хөрөнгө оруулагчдын зүгээс тавигдаж буй шаардлага, Монгол Улсын аж ахуйн нэгжүүдийн өнөөгийн нөхцөл байдлыг дүгнэн хэлсэн юм.
Мөн Ризиллиенс Консалтинг Сервиз ХХК-ийн гүйцэтгэх захирал Ц.Нямгарав байгууллагууд ESG-г хэрхэн шат дараатай нэвтрүүлэх, тайлагнах арга зүй болон стандартын талаар мэргэжлийн зөвлөгөө өгөв.
Мөн Инвескор ББСБ ХК, Ханбогд кашимер ХХК, Тесо Групп болон BIPV Mongolia зэрэг байгууллагууд өөрсдийн үйл ажиллагаандаа ESG-г нэвтрүүлсэн туршлагаасаа хуваалцаж, оролцогчдод практик мэдээлэл өгсөн нь онцлох үйл явдал байлаа.
Арга хэмжээний төгсгөлд оролцогчид ESG (Байгаль орчин, Нийгэм, Засаглал)-ийн стандартыг байгууллагын стратеги, үйл ажиллагаанд хэрхэн уялдуулах, тайлагналын аргачлал, зах зээлийн чиг хандлага болон үндэсний компаниудын сайн туршлагыг танилцуулж, харилцан хэлэлцүүлэг өрнүүллээ. Энэхүү хэлэлцүүлэг нь Монголын бизнес эрхлэгчид олон улсын стандартад нийцэн ажиллах, хариуцлагатай засаглалыг төлөвшүүлэхэд чухал түлхэц болж байгааг зохион байгуулагчид онцолсон юм.
