ЦАХИМ ЭДИЙН ЗАСАГ ДАХЬ ЭМЭГТЭЙ ЭКСПОРТЛОГЧДЫГ ДЭМЖИХ “WEIDE” САНГИЙН ТӨСЛИЙН 2026 ОНЫ СУРГАЛТУУД ЭХЭЛЛЭЭ
МҮХАҮТ нь Дэлхийн худалдааны байгууллага (WTO), Олон улсын худалдааны төв (ITC)-тэй хамтран хэрэгжүүлж буй Цахим эдийн засаг дахь эмэгтэй экспортлогчдыг дэмжих “WEIDE” сангийн төслийн /2026 он/ энэ жилийн сургалтууд эхэллээ.
Тус сургалт нь /2026.03.03/ 4 хоногийн турш үргэлжлэх бөгөөд эмэгтэй бизнес эрхлэгчдийг цахим экспортын бодит оролцогч болгон чадавхжуулах, олон улсын зах зээлд өрсөлдөх чадварыг нь нэмэгдүүлэхэд чиглэж байна.
Сургалтын хүрээнд бараа бүтээгдэхүүний үнэ тогтоолт, ашигт ажиллагааг сайжруулах аргачлал, давхар татварын гэрээ, экспортын барааны НӨАТ, ААНОАТ, дижитал маркетинг ба борлуулалтын сувгийг нэмэгдүүлэх стратеги болон зөөлөн ур чадварын мэдлэг ойлголтыг олж авах юм.
Өнөөдрийн сургалтыг нээж МҮХАҮТ-ын Ерөнхий нарийн бичгийн дарга Б.Саруул хэлсэн үгэндээ: “Энэхүү төслөөр дамжуулан та бүхнийг цахим экспортын бодит оролцогч болгох, орлогыг нэмэгдүүлэх, олон улсын зах зээлд тогтвортой байр суурь эзлэхэд дэмжлэг үзүүлэх явдал юм. Мөн эмэгтэйчүүдийн эдийн засгийн оролцоо нэмэгдэх нь зөвхөн нэг бизнесийн амжилт биш энэ бол өрхийн орлого, нийгмийн хөгжил, үндэсний эдийн засгийн өсөлтөд оруулж буй томоохон хувь нэмэр юм” хэмээн онцоллоо.
“WEIDE” сангийн төсөл нь эмэгтэй экспортлогчдыг цахим худалдаа, дижитал шилжилт, татварын мэдлэг, санхүүгийн чадавх, зах зээлийн өргөжилтийн чиглэлээр системтэй дэмжиж, Монгол Улсаас олон улсын зах зээлд гарч буй эмэгтэйчүүдийн оролцоог нэмэгдүүлэх зорилготой юм.
Сургалтыг WEIDE төслийн сургагч багш Н.Энхсайхан болон З.Одмаа нар удирдан явуулж байна
