ГАДААД ХУДАЛДААНЫ ГЭРЭЭ, ХЭЛЭЛЦЭЭР БА ХӨРӨНГӨ ОРУУЛАЛТЫН МАРГААН ШИЙДВЭРЛЭХ ПРАКТИК ШИЙДЛҮҮДИЙГ ХЭЛЭЛЦЛЭЭ
МҮХАҮТ болон Эдийн засаг, хөгжлийн яам хамтран зохион байгуулж буй "Нээлттэй өдрүүд" арга хэмжээний хоёр дахь өдөр "Гадаад худалдааны гэрээ, хэлэлцээр хийхэд анхаарах асуудлууд" сэдвийн хүрээнд амжилттай болж өндөрлөлөө. Арга хэмжээг нээж ЭЗХЯ-ны Хөрөнгө оруулалтын бодлогын газрын дарга Б.Мөнх-Эрдэнэ хөрөнгө оруулалтын орчны тогтвортой байдал, бодлогын зохицуулалтыг онцолсон бол МОУА-ын дарга С.Энхцэцэг гадаад худалдааны гэрээг мэргэжлийн түвшинд байгуулж эрсдэлээс сэргийлэх болон маргааныг арбитраар шийдвэрлэх баталгааны талаар тэмдэглэн хэллээ.
Өнөөдрийн хэлэлцүүлэг гадаад худалдааны гэрээ байгуулахад анхаарах суурь асуудлууд, хөрөнгө оруулалтын маргааныг шийдвэрлэх олон улсын арга замууд болон практик туршлага, хөрөнгө оруулалтын гэрээнээс үүдэлтэй маргааныг арбитраар шийдвэрлэх эрх зүйн орчин болон арбитрын шийдвэрийг хүлээн зөвшөөрч биелүүлэх үйл явц гэсэн гол сэдвүүдийн хүрээнд өрнөсөн юм.
Б.Мөнх-Эрдэнэ (ЭЗХЯ-ны Хөрөнгө оруулалтын бодлогын газрын дарга) "Хөрөнгө оруулагчийн эрх ашгийг хамгаалах арга хэмжээний тухай" илтгэл тавьж, төрөөс хөрөнгө оруулалтын орчныг тогтвортой байлгах, бодлогын түвшинд хөрөнгө оруулагчдыг дэмжих чиглэлээр хэрэгжүүлж буй арга хэмжээг танилцууллаа.
С.Энхцэцэг (МОУА-ын Дарга) "Арбитрын шийдвэрийг хүлээн зөвшөөрөх, биелүүлэх эрх зүйн зохицуулалт" сэдвээр илтгэл тавьж, гаргасан шийдвэрийг бодит ажил хэрэг болгох олон улсын болон дотоодын эрх зүйн баталгааг танилцуулав.
М.Шинэбаяр (МОУА-ын Ерөнхий нарийн бичгийн дарга) "Гадаад худалдааны гэрээ, хэлэлцээр хийхэд анхаарах асуудлууд" сэдвээр илтгэл тавьж, олон улсын хэлцэл байгуулахад гаргадаг түгээмэл алдаанууд болон эрсдэлийг хэрхэн удирдаж, хууль эрх зүйн хүрээнд өөрсдийгөө хамгаалах практик зөвлөмжүүдийг өглөө.
Ш.Бүжинлхам (МОУА-ын Нарийн бичгийн дарга) "Хөрөнгө оруулалтын маргаан шийдвэрлэх арга хэрэгслүүд" сэдвээр илтгэл тавьж, бизнес эрхлэгчид маргаан үүссэн тохиолдолд ямар механизмыг сонгож ажиллах нь илүү үр дүнтэй болох талаар мэдээлэл өгөв.
Э.Байгал (МОУА-ын Арбитрч) "Хөрөнгө оруулалтын маргаан шийдвэрлэх эрх зүйн орчин, практик туршлага" сэдвийн хүрээнд илтгэл тавьж, маргаан шийдвэрлэх явцад гардаг практик сорилтууд болон тэдгээрийг даван туулсан бодит жишээнүүдээс хуваалцлаа.
Н.Батдорж (МОУА-ын Нарийн бичгийн дарга) "Хөрөнгө оруулалтын гэрээнээс үүдэлтэй маргааныг арбитраар шийдвэрлэх нь" сэдвийн хүрээнд илтгэл тавьж, арбитрын хянан шийдвэрлэх ажиллагааны онцлог, давуу талуудыг дэлгэрэнгүй тайлбарлав.
Арга хэмжээний төгсгөлд хэлэлцүүлэг өрнөж оролцогчид гадаад худалдааны гэрээ байгуулахад анхаарах практик алхмууд, хөрөнгө оруулалтын маргаанаас урьдчилан сэргийлэх арга зам болон арбитрын шийдвэр гүйцэтгэлийн талаар сонирхсон асуултдаа экспертүүдээс шууд хариулт авснаар өнөөдрийн үйл ажиллагаа өндөрлөлөө.
