МҮХАҮТ ГАДААД ДАХЬ ТӨЛӨӨЛӨГЧДИЙНХӨӨ УУЛЗАЛТЫГ ЗОХИОН БАЙГУУЛЖ, 2026 ОНЫ СТРАТЕГИЙН ЗОРИЛТОО ТОДОРХОЙЛЛОО
Монголын Үндэсний Худалдаа Аж Үйлдвэрийн Танхим (МҮХАҮТ)-ын Хятад дахь төлөөлөгчдийн уулзалт амжилттай зохион байгуулагдаж, гадаад улс орнуудад ажиллаж буй төлөөлөгчдийн хамтын ажиллагаа, цаашдын зорилт, төлөвлөлтийн асуудлыг хэлэлцлээ.
Уулзалтын хүрээнд 21 аймаг дахь салбар танхимуудын удирдлагын төлөөллүүдтэй танилцан бизнесийн орчин, тулгамдаж буй асуудал, цаашдын хамтын ажиллагааны талаар санал бодлоо солилцов. Орон нутаг болон гадаад дахь төлөөлөгчдийн уялдаа холбоог бэхжүүлэх, мэдээллийн нэгдсэн урсгалыг бий болгох, бизнес эрхлэгчдэд үзүүлэх дэмжлэгийг бодитой болгоход онцгой анхаарах шаардлагатайг талууд онцлон тэмдэглэсэн юм.
Өнөөдрийн байдлаар МҮХАҮТ нь нийт 7 улсын 15 төлөөлөгчтэйгээр үйл ажиллагаа явуулж байна. Танхимыг төлөөлөн ажиллаж буй эдгээр төлөөлөгчид нь үндэсний бизнес эрхлэгчдийг олон улсын зах зээлд гаргах, гадаад хамтын ажиллагааг бодит ажил хэрэг болгох чухал гүүр болж байгаа бөгөөд одоогоор БНХАУ-д 7, ОХУ болон Япон улсад тус бүр 2, Их Британи, Турк, Аргентин, Катар улсад тус бүр 1 төлөөлөгч ажиллаж байна.
Ялангуяа БНХАУ болон Япон улсад албан ёсны төлөөлөгчийн газруудыг нээн ажиллуулж, тухайн улс орнуудад Танхимын үйл ажиллагааг идэвхжүүлэх, мэдээлэл солилцох, хамтарсан төсөл хэрэгжүүлэхэд онцгой анхаарч байгааг уулзалтын үеэр онцоллоо.
Уулзалтаар 2026 оны стратеги, зорилтыг тодорхойлж, төлөөлөгчийн газруудын үйл ажиллагааны цар хүрээг өргөжүүлэх чиглэлээр хэд хэдэн чухал асуудлыг хэлэлцэв. Үүнд 2026 оны үйл ажиллагааны төлөвлөлт, бизнесийн зуучлал, мэдээллийн урсгалыг нэмэгдүүлэх, суурин төлөөлөгч нарын харилцан уялдаа холбоог сайжруулах, нэгдсэн мэдээллийн сан, тайлагналын тогтолцоог бий болгох зэрэг асуудлууд багтсан юм.
Мөн МҮХАҮТ болон гишүүн байгууллагуудын үйл ажиллагааг гадаад зах зээлд сурталчлах, хөрөнгө оруулалтын боломжийг таниулах маркетингийн ажлуудыг эрчимжүүлж, бизнес форум, B2B уулзалт, экспо арга хэмжээг тогтмол зохион байгуулахаар болов.
Түүнчлэн БНХАУ-ын XV таван жилийн төлөвлөгөөний (2026–2030 он) хүрээнд Монгол, Хятадын бизнесийн хамтын ажиллагааг өргөжүүлэх боломж, хөрөнгө оруулалт, худалдааны шинэ чиглэлүүдийн талаар санал солилцож, хамтарсан төсөл, санаачилгуудыг дэмжин ажиллахаар тохиролцлоо.
