ЭКСПОРТЛОГЧДОД ЗОРИУЛСАН "НЭЭЛТТЭЙ ӨДРҮҮД" АРГА ХЭМЖЭЭНИЙ ЭХНИЙ ӨДӨР АМЖИЛТТАЙ БОЛЖ ӨНДӨРЛӨЛӨӨ
Монгол Улсын Засгийн газраас хэрэгжүүлж буй экспортыг дэмжих, эдийн засгийг төрөлжүүлэх бодлогын хүрээнд Эдийн засаг, хөгжлийн яам болон Монголын Үндэсний Худалдаа Аж Үйлдвэрийн Танхим (МҮХАҮТ) хамтран зохион байгуулж буй "Нээлттэй өдрүүд" цуврал арга хэмжээ өнөөдөр Засгийн газрын XI байрны "Хөрөнгө оруулагчийн эрх ашгийг хамгаалах төв"-д эхэллээ.
Арга хэмжээний эхний өдөр "Экспорт, гадаад худалдааны боломжууд" сэдвийн дор өрнөсөн бөгөөд нээлтийн ажиллагаанд Эдийн засаг, хөгжлийн яамны Бизнесийн орчин, бодлогын газрын дарга Л.Балчинлувсан болон МҮХАҮТ-ын Гүйцэтгэх захирал Т.Магнайбаатар нар оролцож, төр болон хувийн хэвшлийн түншлэлийг бэхжүүлэх замаар үндэсний үйлдвэрлэгчдийг гадаад зах зээлд гарахад нь бодлогын болон практик дэмжлэг үзүүлэх ач холбогдлыг онцлон тэмдэглэв.
Арга хэмжээг МҮХАҮТ-ын Дэд захирал Ч.Баттулга чиглүүлэн модератороор ажиллаж, экспортлогчид болон бизнес эрхлэгчдийн дунд нээлттэй хэлэлцүүлэг өрнүүлсэн юм.
Өнөөдрийн арга хэмжээгээр Эдийн засаг, хөгжлийн яам, Гаалийн ерөнхий газар болон МҮХАҮТ-ын нарийн мэргэжлийн шинжээчид Евразийн эдийн засгийн холбооны түр хэлэлцээр, Европын холбооны "REX" систем, гаалийн татварын ангилал (БТКУС) болон давагдашгүй хүчин зүйлийн талаарх нарийвчилсан мэдээллийг хүргэж, оролцогчдын сонирхон асуултуудад хариулт өгсөн бөгөөд ААН-үүд гадаад зах зээлд гарахад тулгардаг тарифын болон тарифын бус саад тотгорыг давах бодит гарцуудыг хэлэлцлээ.
"Нээлттэй өдрүүд" арга хэмжээ маргааш буюу 2026 оны 3 дугаар сарын 3-ны Мягмар гарагт "Гадаад худалдааны гэрээ, хэлэлцээр хийхэд анхаарах асуудлууд" сэдвийн дор үргэлжилнэ. Маргаашийн хэлэлцүүлгээр олон улсын худалдааны гэрээ байгуулахдаа талуудын хүлээх эрх үүрэг, хөрөнгө оруулалтын маргаан шийдвэрлэх эрх зүйн орчин болон арбитрын зохицуулалтын талаар нарийвчилсан зөвлөгөө мэдээллийг хүргэх юм. Олон улсын зах зээлд бизнесээ хамгаалж, хууль эрх зүйн эрсдэлгүй ажиллах арга замуудыг танилцуулах тул бизнес эрхлэгчид, хуулийн зөвлөхүүдийг маргаашийн хэлэлцүүлэгт өргөнөөр оролцохыг урьж байна.
