МЭРГЭЖЛИЙН БОЛОВСРОЛЫН САЛБАРЫН САНХҮҮЖИЛТ, ХУВЬСАХ ЗАРДЛЫН ШИНЭЧЛЭЛИЙГ 2026 ОНД ЭРЧИМЖҮҮЛНЭ

Монгол Улсын техникийн болон мэргэжлийн боловсрол, сургалтын салбарын шинэчлэлийг дэмжих “Түншлэлд суурилсан техникийн болон мэргэжлийн боловсрол, сургалт II” төслийн Удирдах хорооны ээлжит хурал өнөөдөр боллоо. Хурлаар төслийн 2025 оны хэрэгжилтийн үр дүнг дүгнэж, 2026 оны эхний хагас жилд хэрэгжүүлэх үйл ажиллагааны төлөвлөгөөг хэлэлцэн баталлаа. Тус төслийг Германы Холбооны Эдийн засгийн хамтын ажиллагаа, хөгжлийн яам (BMZ), Австралийн Гадаад хэрэг, худалдааны яам (DFAT)-ны буцалтгүй тусламжаар Боловсролын яам болон Германы Олон Улсын Хамтын Ажиллагааны Нийгэмлэг (GIZ)-тэй хамтран 2026 оны зургаадугаар сар хүртэл хэрэгжүүлж байгаа юм.

Удирдах хорооны дарга, Боловсролын яамны Төрийн нарийн бичгийн дарга Х.Батжаргал 2026 оны эхний хагас жилд мэргэжлийн боловсролын санхүүжилт, хувьсах зардлын шинэчлэлийг дэмжих чиглэлээр тодорхой арга хэмжээг төлөвлөгөөнд тусгаж, холбогдох талуудтай хамтран ажиллах чиглэл өглөө. Мөн МҮХАҮТ-ын дэргэд хосмог сургалтыг дэмжих нэгж байгуулсныг сайшааж, аж ахуйн нэгжүүдийн оролцоог нэмэгдүүлэх, сургалтын байгууллага болон ажил олгогчдын хамтын ажиллагааг өргөжүүлэхэд тус байгууллагын оролцоо чухал болохыг онцлон тэмдэглэв.

Хуралд ХБНГУ-ын Элчин сайдын яамны Эдийн засгийн хамтын ажиллагаа, хөгжлийн хэлтсийн дарга Удо Вебер, Австралийн Элчин сайдын яамны дэд тэргүүн Эндрю Бэрримэн, МҮХАҮТ-ын Ерөнхийлөгч Б.Лхагважав болон бусад төлөөлөл оролцож, төслийн тогтвортой байдлыг хангах талаар байр сууриа илэрхийллээ. Төслийн үлдсэн хугацаанд техникийн болон мэргэжлийн боловсролын салбарын эрх зүйн орчныг боловсронгуй болгох, сургалтын чанарыг олон улсын жишигт хүргэх чиглэлд талууд нягт хамтран ажиллахаар тохиров.