МҮХАҮТ-ЫН 21 АЙМГИЙН САЛБАР ТАНХИМУУД ТАЙЛАНГАА ХЭЛЭЛЦЭЖ, ШИЛДГҮҮДЭЭ ТОДРУУЛЛАА
Монголын Үндэсний Худалдаа Аж Үйлдвэрийн Танхимын 21 аймаг дахь салбар танхимуудын удирдлага, менежерүүд өнгөрсөн оны ажлын ололт амжилтаа дүгнэн тайлангийн хурлаа амжилттай зохион байгууллаа.
Тайлангийн үеэр салбар танхимууд орон нутгийн бизнес эрхлэгчдэд үзүүлсэн дэмжлэг, бүс нутгийн эдийн засгийг эрчимжүүлэх чиглэлээр хэрэгжүүлсэн төсөл хөтөлбөрүүдээ танилцуулж, харилцан туршлага солилцсон юм.
Мөн энэ үеэр салбар танхимын ажилтнуудын чадавхыг бэхжүүлэх зорилгоор "Бизнес ба Хүний эрх" сэдэвт төрөлжсөн сургалт явагдаж, оролцогчид ажлын байрны ёс зүй, хариуцлагатай засаглалын талаар мэргэжил арга зүйн зөвлөгөө авч хүний эрхийн сургагч багш болох эрхээ авлаа. Энэхүү сургалтаар бэлтгэгдсэн сургагч багш нар цаашид өөрсдийн орон нутаг, салбар нэгжүүддээ хүний эрхийн соёлыг түгээх, зөрчлөөс урьдчилан сэргийлэх чиглэлээр ажиллах юм.
Арга хэмжээний төгсгөлд үйл ажиллагааны гүйцэтгэл, гишүүнчлэлийн үйлчилгээний хүртээмж болон орон нутгийн хөгжилд оруулсан хувь нэмрээрээ бусдыгаа манлайлсан шилдэг салбар танхимуудыг шалгарууллаа.
"Шилдэг салбар танхим"-аар Хэнтий, Булган, Орхон, Дархан-Уул аймаг дахь Худалдаа Аж Үйлдвэрийн Танхимууд шалгарсан бол "Шилдэг менежер"-ээр Сүхбаатар аймгийн менежер Э.Батзаяа, Орхон аймгийн менежер Б.Хайдав, Увс аймгийн менежер Б.Батхүү нар тус тус тодорлоо.
Түүнчлэн ажил үйлсээрээ бусдыгаа манлайлсан ажилтнуудад “Худалдааны тэргүүний ажилтан” цол тэмдгийг гардуулан өгсөн юм.
Салбар танхимууд ирэх оны стратеги төлөвлөгөөгөө нэгтгэн, орон нутгийн бизнесийн орчныг чанаржуулахад нэгдмэл зорилготой ажиллахаар боллоо.
