МОНГОЛ, ОРОСЫН БИЗНЕС ЭРХЛЭГЧИД КУРГАН МУЖТАЙ ХАМТЫН АЖИЛЛАГААГАА ШИНЭ ШАТАНД ГАРГАНА
МҮХАҮТ дээр зохион байгуулагдсан “Монгол–Оросын бизнес эрхлэгчдийн уулзалт – Курган муж” дугуй ширээний хэлэлцүүлэг нь хоёр талын эдийн засгийн хамтын ажиллагааг сайжруулах чухал арга хэмжээ боллоо.
Уулзалтын хүрээнд ОХУ-ын Уралын холбооны тойрогт харьяалагддаг, аж үйлдвэр болон машин үйлдвэрлэлийн томоохон төв болох Курган мужийн тэргүүлэх компаниуд барилга, уул уурхай, дэд бүтэц, тоног төхөөрөмжийн чиглэлээрх үйл ажиллагаа, дэвшилтэт технологио танилцуулж, Монголын зах зээлд хамтран ажиллах түншлэлийн саналуудыг ярилцлаа.
Курган муж нь Казахстан улстай хиллэдэг газарзүйн байршлаараа Евроазийн тээвэр, ложистикийн стратегийн бүсэд тооцогддог бөгөөд ялангуяа эм, эмнэлгийн бүтээгдэхүүний үйлдвэрлэлээрээ ОХУ-д онцгой байр суурь эзэлдэг. Тухайлбал, тус мужийн эмийн үйлдвэрүүд ОХУ-ын антибиотикийн нийт хэрэгцээний ойролцоогоор 30 хувийг хангадаг нь Монгол Улстай эрүүл мэнд, эм хангамж, технологи дамжуулах чиглэлээр хамтран ажиллах бодит боломжийг бүрдүүлж байгааг талууд онцоллоо.
Уулзалтыг МҮХАҮТ-ын Гадаад харилцаа, хамтын ажиллагааны газрын дарга Э.Солонго чиглүүлж,МҮХАҮТ-ын Ерөнхийлөгч Б.Лхагважав Курган мужийн ХАҮТ -ын Ерөнхийлөгч Назаренко Илья Викторовичтай танилцан цаашдын хамтын ажиллагааны талаар ярилцлаа.
Мөн МҮХАҮТ-ын Ерөнхий нарийн бичгийн дарга Б.Саруул Монгол Улсын бизнес, хөрөнгө оруулалтын орчны талаар дэлгэрэнгүй илтгэл тавьж, гадаад түншүүдэд хамтран ажиллах боломжуудыг танилцуулав.
ОХУ-ын талаас Курган мужийн ХАҮТ -ын Ерөнхийлөгч Назаренко Илья Викторович, “Темпер Рус” компанийн Экспортын захирал Первухин Сергей Владимирович, КМЗКО компанийн Маркетингийн хэлтсийн дарга Трубина Анастасия Сергеевна болон Курганы Замын Машин Үйлдвэрийн захирал Кокорин Василий Евгеньевич нар оролцож, өөрсдийн төлөөлж буй байгууллагын үйл ажиллагаа, хамтын ажиллагааны бодит шийдлүүдийг санал болгосон юм.
