БИЗНЕСИЙН ӨСӨЛТ БА ХӨРӨНГӨ ОРУУЛАЛТЫН ОРЧИН, МҮХАҮТ-ЫН НЭЭЛТТЭЙ ӨДРҮҮД АРГА ХЭМЖЭЭНД УРЬЖ БАЙНА

2026/02/26 1

Монгол Улсын Засгийн газрын бодлогын хүрээнд хөрөнгө оруулалтын орчныг сайжруулах, дотоод болон гадаадын хөрөнгө оруулагчдын хууль ёсны эрх ашгийг хамгаалах зорилгоор Эдийн засаг, хөгжлийн яамны дэргэд “Хөрөнгө оруулагчдын эрх ашгийг хамгаалах төв” байгуулагдан үйл ажиллагаагаа идэвхтэй явуулж байна. Үүнтэй холбогдуулан төр-хувийн хэвшлийн түншлэлийг бэхжүүлэх, бизнес эрхлэгчдэд тулгарч буй асуудлыг шийдвэрлэх арга замыг тодорхойлох зорилгоор МҮХАҮТ-ын нээлттэй өдрүүд арга хэмжээ 2026 оны 3 дугаар сарын 02-ноос 04-ний өдрүүдэд зохион байгуулагдах гэж байна.

Энэхүү арга хэмжээнд хүрэлцэн ирснээр Та экспорт, гадаад худалдааны чиглэлээр олон улсын зах зээлд гарах шинэ гарц, чөлөөт худалдааны боломжуудыг хэрхэн ашигтайгаар ашиглах, Евразийн эдийн засгийн холбоо болон Европын холбооны хөнгөлөлтийн системүүдэд хамрагдах талаар дэлгэрэнгүй мэдээлэл авах боломжтой. Мөн гадаад худалдааны гэрээ, хэлэлцээр байгуулахад анхаарах практик асуудлууд, гэрээний харилцаан дахь давагдашгүй хүчин зүйлээс үүсэх эрсдэлийг удирдах, хөрөнгө оруулалтын маргааныг арбитраар шийдвэрлэх эрх зүйн орчин болон практик туршлагын талаар мэргэжлийн экспертүүдээс зөвлөгөө авах юм.

Түүнчлэн орчин үеийн бизнесийн хамгийн чухал шалгуур болоод буй Хариуцлагатай бизнес ба ESG (Байгаль орчин, Нийгэм, Засаглал) стандартыг үйл ажиллагаандаа хэрхэн нэвтрүүлж тайлагнах арга зүй, энэ чиглэлийн зах зээлийн судалгааны үр дүн болон аж ахуйн нэгжүүдийн сайн туршлагуудтай танилцах сургалт, хэлэлцүүлэгт хамрагдах боломж бүрдэж байна.

Үүний зэрэгцээ МҮХАҮТ-ын гишүүнээр элсэх давуу тал, өөрийн бараа бүтээгдэхүүнээ оюуны өмчид бүртгүүлж үнэ цэнийг нь өсгөх арга зам, бизнесийн төрөл бүрийн сургалтууд болон гадаад, дотоодын үзэсгэлэн, бизнес аяллын талаарх нэгдсэн мэдээллийг нэг дороос авах боломжтой ба мэргэжилтнүүд танд дэмжлэг үзүүлж, шаардлагатай зөвлөгөө, мэдээллээр ханган ажиллах болно.

ХӨТӨЛБӨР