БИЗНЕСИЙН САЛБАРТ ХҮНИЙ ЭРХИЙН СОЁЛЫГ ТҮГЭЭХ СУРГАГЧ БАГШ НАРЫГ БЭЛТГЭЛЭЭ
МҮХАҮТ болон ХЭҮК хамтран орон нутгийн салбар танхимуудын удирдлага, менежерүүдийг чадавхжуулах, бизнесийн салбарт хүний эрхийн соёлыг түгээх “Сургагч багш бэлтгэх” хоёр өдрийн сургалтыг зохион байгууллаа.
Сургалтыг нээж ХЭҮК-ын гишүүн, доктор Г.Нарантуяа бизнесийн байгууллагуудад хүний эрхийг хамгаалах чиглэлээр төрөөс баримталж буй бодлогыг танилцуулж, бодит үр дүнгийн жишээнүүдийг дурдсан юм. Тухайлбал, "Траст Трейд" ХХК хүний эрхийн магадлан шинжилгээ хийж, ажилтнуудынхаа ажиллах орчин, нийгмийн асуудлыг шийдвэрлэснээр ажлын бүтээмжээ 20 гаруй хувиар өсгөж чадсан нь бусад аж ахуйн нэгжүүдэд үлгэр дуурайлал болохуйц сайн туршлага болж байна гэдгийг тэрээр онцлов.
Мөн нээлтэд МҮХАҮТ-ын Гүйцэтгэх захирал Ц.Магнайбаатар оролцон орчин үеийн бизнесийн амжилт зөвхөн ашгаар бус, хүний эрхийг хэрхэн дээдэлж байгаагаар хэмжигддэг болсныг тэмдэглээд, хүнд ээлтэй, ёс зүйтэй бизнес байх нь олон улсын зах зээлд өрсөлдөх гол шалгуур болохыг хэллээ. Цаашид орон нутгийн сургагч багш нараараа дамжуулан хүний эрхийн ойлголт, хандлагыг салбар бүрд таниулах олон талт ажлыг тогтвортой хэрэгжүүлэхээс гадна ХЭҮК-той байгуулсан санамж бичгийн хүрээнд гишүүн байгууллагууддаа хүний эрхийн чиглэлээр олон ажил төлөвлөж буйгаа дурдлаа.
Сургалтын эхний өдөр байгууллагын үйл ажиллагаанд хүний эрхэд суурилсан хандлагыг төлөвшүүлэх, бизнесийн хүрээнд хүний эрхийг хангах олон улсын стандарт болон "Бизнес ба хүний эрхийн удирдах зарчим"-ын талаарх хөдөлмөрлөх эрхийн асуудлууд, тэр дундаа ажил эрхлэлт, хөдөлмөрийн харилцааны үндэсний болон олон улсын эрх зүйн зохицуулалтыг нарийвчлан танилцууллаа. Оролцогчид ялгаварлан гадуурхалт, дарамт, хүчирхийлэл болон албадан хөдөлмөрийн шинжийг таньж сурахаас гадна ажлын байрны бэлгийн дарамтаас урьдчилан сэргийлэх арга зүйд суралцсан юм.
Мөн бизнесийн үйл ажиллагаанд хүүхдийн эрхийг хамгаалах 10 зарчим болон энэ чиглэлээрх хувийн хэвшлийн байгууллагын үүрэг, оролцоог багийн ажлаар дамжуулан гүнзгийрүүлэн судалсан бол сургалтын өөр нэг чухал хэсэг нь хүний хувийн мэдээллийг хамгаалах, бизнесийн үйл ажиллагааны мэдээллийн аюулгүй байдлын талаарх боловсролыг оролцогчдод олгож байгаараа онцлог байлаа.
Сургалтын төгсгөлд ХЭҮК-ын гишүүн Г.Нарантуяа болон МҮХАҮТ-ын Ерөнхийлөгч Б.Лхагважав нар оролцогчдод сертификат гардуулсан юм. Энэ үеэр МҮХАҮТ-ын Ерөнхийлөгч Б.Лхагважав, бизнесийн салбарт хүний эрхийг дээдлэх зарчмыг онцлон сануулаад бизнес гэдэг бол зөвхөн ашиг олох хэрэгсэл биш, харин хүн төвтэй үйл ажиллагаа бөгөөд нийгмийн хариуцлага, хүний халдашгүй эрх дээр тогтдог болохыг хэлэв.Тэрээр монгол хүний эрх чөлөөний омогшил, тусгаар тогтнолын үнэ цэнийг яруу найргийн мөрүүдтэй холбон тайлбарлав. Ялангуяа, "Нуур амгалан бол нугас амгалан" хэмээх гүн ухааныг дурдаж, эрх чөлөөг эрмэлзсэн, эрхэмлэсэн ард түмэн гэдэг нь зөвхөн дууны шүлэг бус, өдөр тутмын ажлын байран дээрх хүнийг дээдлэх соёл, хувийн мэдээллийн нууцлалыг чандлан хадгалах хариуцлага болохыг энгийнээр дүгнэн хэллээ.
Энэхүү сургалтаар бэлтгэгдсэн сургагч багш нар цаашид өөрсдийн орон нутаг, салбар нэгжүүддээ хүний эрхийн соёлыг түгээх, зөрчлөөс урьдчилан сэргийлэх чиглэлээр ажиллах юм.
