МОСКВА ХОТНОО МОНГОЛЫН ҮЙЛДВЭРЛЭГЧИД ЭКСПОРТЫН БОЛОМЖОО ТАНИЛЦУУЛЛАА
ОХУ-ын Москва хотноо (2026.02.11) зохион байгуулагдсан “Монгол-Оросын бизнес уулзалт”-ын хүрээнд Монголын аж ахуйн нэгжүүдийн бараа, бүтээгдэхүүнийг сурталчлах төрөлжсөн үзэсгэлэн амжилттай боллоо.
Энэхүү арга хэмжээ нь хоёр улсын эдийн засгийн түншлэлийг шинэ шатанд гаргах, Монгол брэндийг Оросын зах зээлд албан ёсоор таниулахад чухал ач холбогдолтой үйл явдал болов.
Үзэсгэлэнд Монгол Улсын хөнгөн болон хүнсний үйлдвэрлэлийн салбарын тэргүүлэх аж ахуйн нэгжүүд оролцож, үндэсний үйлдвэрлэлийн шилдэг дээжүүд болох ноос ноолуур, арьс шир, хүнс болон мах махан бүтээгдэхүүнээ дэлгэн үзүүллээ. Монголын үйлдвэрлэгчид өөрсдийн бүтээгдэхүүний байгалийн цэвэр гаралтай байдал, олон улсын стандартад нийцсэн чанар болон экспортын нөөц боломжийн талаар Оросын талын түншүүдэд дэлгэрэнгүй мэдээлэл өгсөн юм.
Арга хэмжээний үеэр Оросын Холбооны Улсын 100 гаруй аж ахуйн нэгжийн төлөөлөл хүрэлцэн ирж, Монголоос нийлүүлэх түүхий эд болон нэмүү өртөг шингэсэн эцсийн бүтээгдэхүүнийг онцгойлон сонирхож байв.
Бизнес эрхлэгчид харилцан ашигтай түншлэл тогтоох, нийлүүлэлтийн сүлжээг өргөжүүлэх бодит боломжуудын талаар санал солилцож, цаашдын хамтын ажиллагааны үндэс суурийг тавилаа.
Энэхүү үзэсгэлэн нь Монголын ААН-үүд Оросын зах зээлд байр сууриа бэхжүүлэх, хоёр орны бизнесийн салбарын итгэлцлийг гүнзгийрүүлэхэд чухал түлхэц болсон бөгөөд экспортын эргэлтийг нэмэгдүүлэхэд жинтэй хувь нэмэр оруулна гэж зохион байгуулагчид дүгнэж байна.
