МҮХАҮТ-ЫН ЕРӨНХИЙЛӨГЧ Б.ЛХАГВАЖАВ ОХУ-ЫН ЭКСПОРТЫН ТӨВ (РЭЦ)-ИЙН ҮЙЛ АЖИЛЛАГААТАЙ ТАНИЛЦАЖ, ХАМТЫН АЖИЛЛАГААНЫ ТАЛААР САНАЛ СОЛИЛЦЛОО
Монгол Улсын Их Хурлын дарга Н.Учралын ОХУ-д хийж буй албан ёсны айлчлалын бүрэлдэхүүнд МҮХАҮТ-ын Ерөнхийлөгч Б.Лхагважаваар ахлуулсан бизнесийн томоохон төлөөлөгчид багтан ажиллаж байна. Тус группт Монгол улсын үндэсний үйлдвэрлэгч, импортлогч 30 гаруй компанийн 60 орчим бизнес эрхлэгч оролцож байгаа юм.
Бизнес эрхлэгчид хөрш орны экспортын дэмжлэгийн тогтолцоо, бизнес эрхлэгчдийг гадаад зах зээлд гарахад үзүүлдэг цогц үйлчилгээний туршлагаас судалж, хоёр улсын худалдааны эргэлтийг нэмэгдүүлэх боломжуудыг судлах зорилгоор ОХУ-ын Экспортын төв (РЭЦ)-д зочиллоо. Уулзалтын эхэнд РЭЦ-ийн удирдлагууд тус төвийн үйл ажиллагааны үндсэн загвар болон Оросын аж ахуйн нэгжүүдэд үзүүлдэг төрийн оролцоотой мэргэжлийн үйлчилгээний талаар дэлгэрэнгүй танилцуулга хийлээ. РЭЦ нь экспортлогчдод зөвхөн зөвлөгөө өгөөд зогсохгүй, экспортын санхүүжилт, даатгал, банкны баталгаа гаргах зэрэг санхүүгийн бодит хөшүүргүүдийг нэг дороос санал болгодог байна. Мөн олон улсын зах зээлийн нарийвчилсан судалгааг хийж, тухайн улсын стандарт, техникийн зохицуулалтад бүтээгдэхүүнийг нийцүүлэх, үзэсгэлэн яармагт оролцох зардлыг хөнгөлөх зэргээр компаниудын гадаад зах зээлд нэвтрэх зардлыг бууруулдаг болохыг онцоллоо.
Ялангуяа ОХУ-ын экспортлогчдын бүтээгдэхүүн, үйлчилгээг олон улсад нэгдсэн имижээр таниулах зорилготой "Made in Russia" үндэсний брэндийн хэрэгжилт, түүний хүрээнд олгогддог баталгаажуулалт болон сурталчилгааны механизмуудын талаар талууд дэлгэрэнгүй санал солилцов. Энэхүү систем нь тухайн бүтээгдэхүүнийг олон улсын түвшинд итгэл даахуйц, чанартай гэдгийг илтгэх гол тэмдэг болдог байна.
МҮХАҮТ-ын Ерөнхийлөгч Б.Лхагважав уулзалтын үеэр хэлсэн үгэндээ, Монгол Улсын хувьд уул уурхайн бус экспортыг дэмжих, нэмүү өртөг шингэсэн бүтээгдэхүүнийг гадаад зах зээлд гаргахад ийм төрлийн мэргэжлийн бүтцийн дэмжлэг, санхүүгийн даатгалын тогтолцоо нэн шаардлагатай байгааг тэмдэглээд, РЭЦ-ийн туршлагыг дотооддоо нутагшуулах, хоёр улсын бизнес эрхлэгчдийг холбох гүүр болоход бэлэн байгаагаа илэрхийллээ.
Энэхүү айлчлал нь Монголын бизнес эрхлэгчид Оросын зах зээлд бараа бүтээгдэхүүнээ нийлүүлэх, мөн тус улсын экспортын санхүүжилтийн хэрэгслүүдийг ашиглан хамтарсан төсөл хөтөлбөр хэрэгжүүлэх шинэ боломжуудыг нээж байгаагаараа ач холбогдолтой юм.
