МОНГОЛЫН ХУВИЙН ХЭВШЛИЙНХЭН ЕВРАЗИЙН ЭДИЙН ЗАСГИЙН ХОЛБООНЫ ЗАХ ЗЭЭЛД ГАРАХ БОЛОМЖУУДЫГ ХЭЛЭЛЦЭВ
ОХУ-ын Москва хотноо 2026 оны 2 дугаар сарын 09-ны өдөр Монгол Улсын хувийн хэвшлийн төлөөлөгчдөд зориулсан өндөр түвшний семинар амжилттай зохион байгуулагдлаа. Евразийн эдийн засгийн комиссын (ЕЭЗК) байранд болсон уг арга хэмжээ нь Монгол Улс болон Евразийн эдийн засгийн холбоо (ЕАЭЗХ) хоорондын худалдааны эргэлтийг нэмэгдүүлэх, бизнес эрхлэгчдэд тулгардаг техникийн саад тотгорыг арилгахад чиглэв.
Семинарын эхэнд ЕЭЗК-ын Удирдах зөвлөлийн дарга Бакытжан Сагинтаев болон Монгол Улсын Их Хурлын дарга Ням-Осорын Учрал нар "1+9" хэлбэрээр хоёр талын уулзалт хийж, эдийн засгийн хамтын ажиллагааны стратегийн асуудлуудыг хэлэлцлээ. Үүний дараа ЕЭЗК-ын Худалдаа хариуцсан сайд Андрей Слепнёв семинарыг нээж, ЕАЭЗХ болон Монгол Улсын хооронд байгуулагдсан Худалдааны түр хэлэлцээрийн гол заалтууд, хэтийн төлөв болон хэлэлцээр хүчин төгөлдөр болох хугацааны талаар нэгдсэн танилцуулга хийв.
Семинарын үндсэн хэсэгт ОХУ-ын салбар хариуцсан удирдах албан тушаалтнууд Монголын бизнес эрхлэгчдэд чиглэсэн танилцуулгыг хийв.
ОХУ-ын Хөдөө аж ахуйн дэд сайд М. Маркович хэлсэн үгэндээ хөдөө аж ахуйн гаралтай бүтээгдэхүүний худалдааг дэмжих нь хоёр улсын эдийн засгийн тэргүүлэх чиглэл болохыг онцлов. Тэрээр энэ салбарт хамтын ажиллагааны асар их нөөц боломж байгааг тэмдэглээд, Монгол Улсаас нийлүүлж буй бараа бүтээгдэхүүний нэр төрөл, хэмжээг нэмэгдүүлэхэд Оросын тал бэлэн байгааг илэрхийлсэн юм.
Монголын экспортлогчдод тулгардаг гол асуудлын нэг болох хяналт шалгалтын талаар Мал эмнэлэг, ургамал хамгааллын холбооны албаны төлөөлөгч А. Даушев дэлгэрэнгүй мэдээлэл өглөө. Тэрээр амьтан, ургамлын эрүүл ахуйн (SPS) шаардлагуудыг хэрхэн хангах, олон улсын стандартад нийцсэн баталгаажуулалтыг хэрхэн хийх талаар бизнес эрхлэгчдэд зөвлөгөө өгсөн юм.
Түүнчлэн Холбооны итгэмжлэлийн албаны дарга Д. Волвач ЕАЭЗХ-ны гишүүн орнуудын зах зээлд мөрдөгдөж буй заавал мөрдөх техникийн зохицуулалтын талаар тайлбарлав. Ингэснээр бүтээгдэхүүний тохирлын үнэлгээг зөв хийлгэх нь бараа бүтээгдэхүүн саадгүй нэвтрэх үндэс болохыг тэрээр онцлон тэмдэглэсэн.
Худалдааны эргэлтийг хурдасгахад гаалийн байгууллагын үүрэг оролцоо чухал болохыг Холбооны гаалийн албаны дэд дарга С. Шкляев дурдлаа. Тэрээр гаалийн хилээр бараа нэвтрүүлэхэд тавигдах шаардлагуудыг танилцуулж, бичиг баримтын бүрдүүлэлтийг цахимжуулах замаар хугацаа хэмнэх, процедурын хүнд суртлыг бууруулах хөнгөвчилсөн арга замуудыг танилцуулсан юм. Семинарын онцлох нэгэн сэдэв нь орчин үеийн цахим зах зээл (Marketplace)-ийн давуу тал байлаа. Евразийн хамгийн том онлайн платформ болох "Wildberries" компанийн Төслийн албаны дарга М. Андреев Монголын үйлдвэрлэгчид борлуулалтаа хил хязгааргүй нэмэгдүүлэх бодит гарцуудыг танилцууллаа.
Семинарын төгсгөлд талууд асуулт хариулт өрнүүлж, хувийн хэвшлийнхэнд тулгарч буй тодорхой асуудлуудыг хэлэлцлээ. Хаалтын үгийг Сайд Андрей Слепнёв болон Монгол Улсын Эдийн засаг, хөгжлийн дэд сайд С. Даваасүрэн нар хэлж, энэхүү арга хэмжээ нь Монгол Улсын бараа бүтээгдэхүүн Евразийн зах зээлд өрсөлдөх чадвараа нэмэгдүүлэх, экспортлогчдод төрийн болон олон улсын байгууллагуудын зүгээс үзүүлэх дэмжлэгийг тодорхой болгосон чухал алхам болсныг тэмдэглэлээ.
МҮХАҮТ-ын гишүүн, Монголын хүнсний үйлдвэрлэлийн салбарыг төлөөлсөн 30 гаруй бизнес эрхлэгч энэхүү арга хэмжээнд хамрагдаж, экспортын шинэ гарц, боломжуудын талаар туршлага судалж байна.
