ЭКСПОРТЫН БҮРДҮҮЛЭЛТ ИЛҮҮ ХЯЛБАР БОЛЛОО
МҮХАҮТ болон Гаалийн ерөнхий газар хоорондын цахим системийн уялдааг хангах, мэдээлэл харилцан солилцох хамтын ажиллагааны гэрээнд гарын үсэг зурах арга хэмжээ 2026 оны 2 дугаар сарын 5-ны өдөр боллоо. Энэхүү хамтын ажиллагаа нь МҮХАҮТ-аас Монгол Улсын нэгдэн орсон олон улсын гэрээ, хэлэлцээрийг хэрэгжүүлэх, Монгол Улсын Ерөнхий сайдын 2025 оны 41 дүгээр захирамжаар байгуулагдсан Ажлын хэсэгт уул уурхайн бус экспортыг нэмэгдүүлэх хүрээнд дэмжлэг үзүүлэх үүрэг бүхий Ажлын дэд хэсгийн үйл ажиллагааны төлөвлөгөөний биелэлтийг хангах, худалдааг хөнгөвчлөх, гарал үүслийг баталгаажуулах үйл явцыг хялбаршуулах хүрээнд хийгдсэн ажил юм.
Шинээр байгуулсан гэрээний хүрээнд МҮХАҮТ-аас олгосон цахим гарал үүслийн гэрчилгээний мэдээлэл Гаалийн ерөнхий газрын цахим системд шууд дамжих бөгөөд ингэснээр гаалийн бүрдүүлэлтийн шат дамжлага цөөрч, хугацаа хэмнэх ач холбогдолтой. Мөн гэрчилгээ дээрх нууцлал бүхий 16 оронтой код болон QR кодыг ашиглан олон улсын гаалийн байгууллагууд хаанаас ч гэрчилгээний үнэн зөв байдлыг шалгах, баталгаажуулах бүрэн боломжтой болж, Монгол Улсын экспортын бүтээгдэхүүний олон улсын зах зээл дэх өрсөлдөх чадвар, итгэлцэл нэмэгдэж байна.
Тус хамтын ажиллагааны гэрээг МҮХАҮТ-ын Ерөнхийлөгч Б.Лхагважав, ГЕГ-ын дарга П. Дэлгэрнаран нар үзэглэлээ.
Уулзалтад ГЕГ-ын дэд дарга Г.Энхтайван, Гаалийн ерөнхий газрын Татвар орлогын газрын дарга С.Баярмаа, МҮХАҮТ-ын Гүйцэтгэх захирал Ц. Магнайбаатар, ГХБББГ-ын дарга Э.Бадамхорол, БСГ-ын ахлах мэргэжилтэн Б.Батцэцэг, Хуульч Ц.Золбаяр нар байлцав.
