ЭДИЙН ЗАСГИЙН ТҮНШЛЭЛИЙН ТУХАЙ МОНГОЛ УЛС, ЯПОН УЛС ХООРОНДЫН ХЭЛЭЛЦЭЭРИЙН ХАМТЫН АЖИЛЛАГААНЫ ДЭД ХОРООНЫ III УУЛЗАЛТ БОЛЛОО
Эдийн засгийн түншлэлийн тухай Монгол Улс, Япон Улсын хоорондын хэлэлцээр (ЭЗТХ)-ийн хэрэгжилтийг эрчимжүүлэх, худалдаа, хөрөнгө оруулалт, хувийн хэвшлийн хамтын ажиллагааг өргөжүүлэх зорилготой Хамтын ажиллагааны дэд хорооны III уулзалт 2026 оны 1 дүгээр сарын 29-нд зохион байгуулагдлаа.
Уулзалтад Монголын талаас Эдийн засаг, хөгжлийн яам, Гадаад харилцааны яам, Хүнс, хөдөө аж ахуй, хөнгөн үйлдвэрийн яам, Гаалийн ерөнхий газар, Мал эмнэлгийн ерөнхий газар, Ургамал хамгааллын газар, Монголын Үндэсний Худалдаа Аж Үйлдвэрийн Танхим зэрэг байгууллагын нийт 15 төлөөлөгч, Японы талаас Гадаад хэргийн яам, Эдийн засаг, аж үйлдвэрийн яам, Хөдөө аж ахуй, ой, загасны аж ахуйн яам, Монгол Улсад суугаа Япон Улсын Элчин сайдын яам, Япон-Монголын Эдийн засгийн хороо, ЖАЙКА-ийн Монгол дахь Төлөөлөгчийн газар, Японы гадаад худалдааг дэмжих байгууллага (JETRO) зэрэг байгууллагын төлөөлөгчид танхимаар болон цахимаар оролцлоо.
Уулзалтын үеэр хоёр улсын эдийн засаг, хөрөнгө оруулалтын орчин, худалдааны мэдээ, мэдээлэл, Гаалийн ерөнхий газар, Мал эмнэлэг, ургамлын хорио цээрийн гэрчилгээ олгодог байгууллагын өөрчлөлт, шинэчлэл, Уул уурхайн бус бүтээгдэхүүний экспортыг нэмэгдүүлэх боломжууд, хөтөлбөрүүд болон МҮХАҮТ-аас ЭЗТХ-ийн хүрээнд олгосон экспортын барааны гарал үүслийн гэрчилгээний цахимжуулалттай холбоотой мэдээллүүд хийгдэв.
Монголын талын оролцогчдын зүгээс ЭЗТХ-ийн ашиглалт, үр өгөөжийг нэмэгдүүлэхэд ЭЗТХ-ийн хүрээнд тодорхой асуудал хариуцахаар заасан дэд хороодыг идэвхжүүлэх, уялдаа холбоог сайжруулах, хамтарсан үйл ажиллагааны төлөвлөгөө болон хэрэгжилтийн хяналтын механизмыг боловсронгуй болгох, барааны худалдаа, гарал үүслийн дүрэмтэй холбоотой асуудлуудыг үе шаттайгаар шийдвэрлэх шаардлагатайг онцлов.
Уулзалтын үр дүнд ЭЗТХ-ийн хэрэгжилтийг илүү бодит, хэмжигдэхүйц эдийн засгийн үр дүнд хүргэх, хоёр улсын худалдаа, хөрөнгө оруулалтыг нэмэгдүүлэх, хувийн хэвшлийн оролцоог бодитоор дэмжих чиглэлээр хамтарсан санал, зөвлөмжийг боловсруулах, шаардлагатай техникийн уулзалт, арга хэмжээг авч, зохион байгуулахаар шийдвэрлэлээ.
