ТӨРИЙН ХЯНАЛТ ШАЛГАЛТЫН ТУХАЙ ХУУЛИЙН ШИНЭЧИЛСЭН НАЙРУУЛГЫН ТӨСЛИЙН ТАЛААР САНАЛ СОЛИЛЦЛОО

Засгийн газрын Хяналт, хэрэгжүүлэлтийн газраас Төрийн хяналт шалгалтын тухай хуулийн шинэчилсэн найруулгын төслийг боловсруулж байгаатай холбогдуулан худалдаа, үйлчилгээ, эмийн салбарын төлөөлөлтэй санал солилцох салбарчилсан уулзалт, хэлэлцүүлгийг өнөөдөр зохион байгууллаа.

Хэлэлцүүлэгт салбарын бизнес эрхлэгчид болон мэргэжлийн холбоодын удирдлагууд оролцож, төрийн хяналт шалгалтын явцад хуулийн этгээдэд тулгарч буй нийтлэг хүндрэл бэрхшээл, тогтолцоог оновчтой болгох боломжит шийдлүүдийн талаар санал бодлоо илэрхийлэв. Тэд хуулийн шинэчилсэн найруулгад эдгээр асуудлыг тусган, илүү бодитой, хэрэгжихүйц болгоход анхаарахыг хүслээ.

Оролцогчдын зүгээс хяналтын байцаагчдын ёс зүй, харилцаа хандлагын асуудал, хууль тогтоомжийг хувь хүний үзэл бодлоор тайлбарлах явдал зарим тохиолдолд ажиглагддагийг онцлов. Мөн хяналт шалгалтыг хэрэгжүүлэх олон нийтийн зөвлөлийн үйл ажиллагааг мэргэжлийн холбоодод шилжүүлэх нь салбарын үйл ажиллагааг жигдрүүлэх, төрийн хяналт шалгалтын ачааллыг бууруулах давуу талтай гэдгийг дурдлаа.

Түүнчлэн хуулийн төслийг боловсруулах явцад бизнес эрхлэгчдээс гаргасан саналууд хэрхэн тусгагдсан талаар эргэн мэдээлж байх нь хууль, дүрэм журам боловсруулах үйл явцад хувийн хэвшлийн оролцоог нэмэгдүүлэх, идэвхжүүлэхэд чухал нөлөөтэй гэдгийг бизнес эрхлэгчдийн төлөөлөл онцолсон юм.