МҮХАҮТ-ЫН ЕРӨНХИЙЛӨГЧ Б.ЛХАГВАЖАВ БҮГД НАЙРАМДАХ БОЛГАР УЛСААС МОНГОЛ УЛСАД СУУГАА ЭЛЧИН САЙДЫН ЯАМАНД ХЭРГИЙГ ХАМААРАГЧ АЛЕКСАНДРИНА ГИГОВАГ ХҮЛЭЭН АВЧ УУЛЗЛАА.
МҮХАҮТ-ын Ерөнхийлөгч Б.Лхагважав Бүгд Найрамдах Болгар Улсаас Монгол Улсад суугаа Элчин сайдын яаманд Хэргийг хамаарагч Александрина Гиговаг хүлээн авч уулзлаа. Тус уулзалтаар хоёр улсын уламжлалт найрсаг харилцаа, хамтын ажиллагааг өргөжүүлэх боломжийн талаар санал солилцов.
Уулзалтын үеэр Болгар, Монгол Улс дипломат харилцаа тогтоосны 75 жилийн ойг 2025 онд тэмдэглэснийг онцолж, боловсрол, соёл, эдийн засаг, худалдаа зэрэг олон салбарт харилцааг идэвхжүүлэх шаардлагатайг талууд тэмдэглэлээ. Болгар Улс нь Монгол Улстай хамгийн эрт дипломат харилцаа тогтоосон Европын орнуудын нэг юм.
Эдийн засаг, худалдааны хамтын ажиллагааны хүрээнд хоёр улсын худалдааны эргэлт харьцангуй бага түвшинд байгааг тэмдэглэж, хүнс, хөдөө аж ахуй, сүү сүүн бүтээгдэхүүн, эм, эмийн бүтээгдэхүүн, арьс шир, аялал жуулчлал, гоо сайхны бүтээгдэхүүн зэрэг салбарт хамтын ажиллагааг өргөжүүлэх боломжтойг онцлов.
Мөн аялал жуулчлалыг хөгжүүлэх, иргэдийн харилцан зорчих нөхцөлийг сайжруулах хүрээнд Улаанбаатар хотод VFS Global визийн төв нээгдсэн нь Монгол иргэдэд Болгарын виз мэдүүлэхэд илүү хялбар болсон талаар мэдээлэв.
Талууд цаашид бизнес, соёл, боловсролын солилцоог идэвхжүүлж, хоёр улсын хамтын ажиллагааг шинэ түвшинд гаргахаар санал нэгдэв.
