ШИЛДЭГ ЭМЭГТЭЙ БИЗНЕС ЭРХЛЭГЧДЭД "WOMEN OWNED" ТОХИРЛЫН ГЭРЧИЛГЭЭ ГАРДУУЛЛАА

2026/01/22 0

МҮХАҮТ-ын гишүүдийн үнэ цэнийг нэмэгдүүлэх, тэднийг мэдээ мэдээллээр хангах зорилготой “Member Care Event” өдөрлөгийн үеэр эмэгтэй бизнес эрхлэгчдийг дэмжих, тэднийг олон улсын зах зээлд гаргах зорилготой “Women Owned” тохирлын гэрчилгээг гардуулах ёслол боллоо.

Монголын Үндэсний Худалдаа Аж Үйлдвэрийн Танхим болон Голомт банкны хамтын ажиллагааны хүрээнд олгогдож буй энэхүү гэрчилгээ нь эмэгтэйчүүдийн удирдаж буй бизнесийг албан ёсоор баталгаажуулж, тэдэнд санхүүгийн болон зах зээлийн олон давуу талыг олгодог юм.

Бизнес эрхлэгч эмэгтэйчүүдийн шинэ гарц

Ёслолын ажиллагааны үеэр Голомт банкны Жижиг дунд банкны газрын Байгууллага хөгжлийн хэлтсийн Бизнес хөгжлийн менежер Т.Маралмаа уг гэрчилгээний ач холбогдлын талаар дэлгэрэнгүй танилцуулга хийв. Тэрээр хэлэхдээ: "Women Owned гэрчилгээ нь эмэгтэйчүүдийн удирдаж буй бизнесийг олон улсын нийлүүлэлтийн сүлжээнд холбох, дэлхийн стандартыг эх орондоо нутагшуулах том алхам юм. Голомт банкны зүгээс уг гэрчилгээг эзэмшигчдэд зориулсан санхүүгийн тусгай дэмжлэг, хөнгөлөлттэй үйлчилгээнүүдийг санал болгож байна" хэмээн онцолсон юм.

Арга хэмжээний төгсгөлд МҮХАҮТ-ын Гүйцэтгэх захирал Ц.Магнайбаатар болон Голомт банкны төлөөллүүд шалгуур хангасан эмэгтэй захирлуудад гэрчилгээг нь албан ёсоор гардуулан өгч, баяр хүргэлээ. Энэхүү арга хэмжээ нь Монгол улсын эдийн засагт эмэгтэйчүүдийн оролцоог нэмэгдүүлэх, тэднийг дэлхийн зах зээлд өрсөлдөх чадвартай болоход чухал түлхэц болох юм.

"Women Owned" гэрчилгээний бизнест үзүүлэх бодит дэмжлэгүүд

Энэхүү гэрчилгээ нь эмэгтэй бизнес эрхлэгчдийн өрсөлдөх чадварыг дараах гурван үндсэн чиглэлээр нэмэгдүүлдэг чухал ач холбогдолтой юм.

Гэрчилгээ эзэмшигч аж ахуйн нэгжүүд дэлхийн томоохон корпорацуудын "Олон талт нийлүүлэлтийг дэмжих" бодлогод багтах боломжтой болно. Ингэснээр олон улсын зах зээлд өөрийн бүтээгдэхүүн, үйлчилгээг нийлүүлэх, гадаад түншүүдийн итгэлийг хүлээх нөхцөл бүрддэг.
МҮХАҮТ-ын гишүүн байгууллага Голомт банкнаас уг гэрчилгээг авсан бизнес эрхлэгчдэд зориулж санхүүгийн тусгай нөхцөлийг санал болгож байна. Үүнд хөнгөлөлттэй хүүтэй бизнес зээл, хөрөнгө оруулалтын бүтээгдэхүүнүүд болон бизнесийн өсөлтийг дэмжих цогц үйлчилгээнүүд багтаж байгаа юм.
Гэрчилгээ эзэмшигчид МҮХАҮТ-ын дэргэдэх "Бизнес эрхлэгч эмэгтэйчүүдийн зөвлөл"-ийн гишүүн болж, салбартаа манлайлж буй захирлуудтай туршлага солилцох, мэргэжлийн менторшип хөтөлбөрүүдэд хамрагдах замаар удирдлагын ур чадвараа тасралтгүй хөгжүүлэх боломж нээгдэнэ.