ТӨРИЙН ХЯНАЛТ ШАЛГАЛТЫН ХУУЛИЙН ШИНЭЧИЛСЭН НАЙРУУЛГЫН ТӨСЛИЙГ АЖ АХУЙН НЭГЖҮҮДЭД ТАНИЛЦУУЛЛАА
Засгийн газрын Хяналт хэрэгжүүлэлтийн газраас “Төрийн хяналт шалгалтын тухай хуулийн шинэчилсэн найруулгын төсөл”-ийг боловсруулж буйтай холбогдуулан аж ахуйн нэгжүүдийн төлөөлөлтэй санал солилцох танилцуулга уулзалтыг зохион байгууллаа. Уулзалтаар хяналт шалгалтын явцад хуулийн этгээдэд тулгарч буй бодит хүндрэл, бэрхшээлийг сонсох, төрийн хяналт шалгалтын тогтолцоог хэрхэн оновчтой болгох талаар талууд нээлттэй хэлэлцүүлэг өрнүүлэв.
Уулзалтын эхэнд ЗГХХГ-ын дарга Б.Батцэцэг Төрийн хяналт шалгалтын тухай хуулийн шинэчилсэн найруулгын үзэл баримтлалын төслийг танилцуулсан юм. Тэрээр илтгэлдээ төрийн хяналт шалгалтын тогтолцоог боловсронгуй болгох замаар хяналтын давхардал болон хүндрэл чирэгдлийг бууруулах, аж ахуйн нэгжүүдийн үйл ажиллагаанд тулгарч буй бодит саад бэрхшээлийг шийдвэрлэхэд чиглэсэн өөрчлөлт, шинэчлэлийн талаар дэлгэрэнгүй дурдлаа.
Хэлэлцүүлгийн явцад салбар бүрийн төлөөллүүд хяналт шалгалтын практик үйл ажиллагаанд тулгарч буй асуудлуудыг онцлон хөндөв. Тодруулбал, Зөвшөөрлийн тухай хууль, Зөрчлийн тухай хууль болон бусад холбогдох дүрэм, журмуудын уялдаа холбоо хангалтгүй байгаагаас үүдэн хүндрэл бэрхшээл гарч байгааг тэмдэглээд, шинээр боловсруулж буй хуулийн төслийг бодит нөхцөлд нийцүүлэх зайлшгүй шаардлагатай байгааг аж ахуйн нэгжийн төлөөллүүд онцоллоо.
Тус уулзалтад худалдаа үйлчилгээ, эрүүл мэнд, хүнс, хүнд болон хөнгөн үйлдвэр, мэдээлэл технологийн салбарын төлөөлөл болох аж ахуйн нэгжүүд оролцож, өөрсдийн байр сууриа илэрхийллээ.
