ЭНЭТХЭГ-МОНГОЛЫН ХУДАЛДАА, ХӨРӨНГӨ ОРУУЛАЛТЫН ШИНЭ БОЛОМЖУУДЫГ ХЭЛЭЛЦЛЭЭ
МҮХАҮТ-н Ерөнхий нарийн бичгийн дарга Б.Саруул Бүгд Найрамдах Энэтхэг Улсаас Монгол Улсад Суугаа ЭСЯ-аас зохион байгуулж буй “Энэтхэг-Монголын худалдааг дэмжих семинарт” оролцож, Хоёр улсын хооронд дахь худалдаа, эдийн засгийн өнөөгийн байдлын талаар илтгэл тавив.
Энэхүү арга хэмжээг БНЭУ-аас Монгол Улсад Суугаа Элчин Сайд Ноён Атул Малхари Готсурве болон Монгол Улсаас БНЭУ-д Суугаа Элчин Сайд Д.Ганболд нар тус тус нээж үг хэлэв. Нээлтийн үгэндээ хоёр улсын худалдааны харилцаа жил ирэх тусам нэмэгдэж байгааг онцлов. Мөн өнгөрсөн 2025 онд хоёр улс дипломат харилцаа тогтоосны түүхт 70-н жилийн ойн хүрээнд Монгол Улсын Ерөнхийлөгч Ухнаагийн Хүрэлсүх Бүгд Найрамдах Энэтхэг улсад зочилсон бөгөөд энэ нь хоёр улсын харилцаа олон салбарт өргөжин хөгжих боломжийг нэмэгдүүлсэн үр дүнтэй айлчлал болсныг цохон тэмдэглэлээ.
Энэхүү семинарт хоёр улсын бизнес эрхлэгчид болон төрийн төлөөлөгчид оролцон худалдаа, эдийн засгийн харилцааг хэрхэн хөгжүүлэх болон тулгарч буй асуудлуудын талаар хэлэлцэв. Өдөрлөгт уул уурхай, үйлчилгээ, болон эм ханган нийлүүлэлтийн салбарын төлөөлөл Монголын зах зээл дэх арвин боломжууд болон үүнийг үр дүнд хүргэхэд тулгарч буй ложистик болон бусад асуудлын талаар илтгэл тавив.
Хэдий хоёр улсын худалдааны эргэлт жил бүр тогтмол өсөж байгаа хэдий ч Монгол улсын нийт худалдааны эргэлтийн 1% ч хүрэхгүй хэсгийг Энэтхэг Улс эзэлж байна.Тиймээс энэхүү өдөрлөгийн хүрээнд тал бүрийн төлөөлөгчид хоёр улсын худалдааны эргэлтийг хэрхэн нэмэгдүүлэх, худалдаалагдаж бараа бүтээгдэхүүний төрлийг нэмэгдүүлэх болон бодлогын хүрээнд хоёр улсын эдийн засгийн харилцааг хэрхэн сайжруулах талаар хэлэлцэв.
