ЭДИЙН ЗАСГИЙН ЭРХ ЧӨЛӨӨНИЙ ТУХАЙ ХУУЛИЙН ТӨСЛИЙН ТАЛААР ХЭЛЭЛЦЛЭЭ
Ардчилсан намын гишүүдийн санаачлан боловсруулж буй “Эдийн засгийн эрх чөлөөний тухай” хуулийн төслийн нээлттэй хэлэлцүүлэг өнөөдөр Монголын Үндэсний Худалдаа Аж Үйлдвэрийн Танхимд зохион байгуулагдлаа. Уг хэлэлцүүлгийг МҮХАҮТ-ын Ерөнхийлөгч Б.Лхагважав, Гүйцэтгэх захирал Ц.Магнайбаатар нар модераторлон чиглүүлж, төр болон хувийн хэвшлийн төлөөллүүд саналаа солилцлоо.
Хэлэлцүүлэгт УИХ-ын гишүүн Г.Очирбат, Б.Түвшин, Монголын тээвэр логистикийн холбооны ерөнхийлөгч А.Мөнхболд болон бизнесийн салбарын бусад төлөөллүүд оролцож, хуулийн төслийн үзэл баримтлал, ач холбогдлын талаар санал солилцов. Энэхүү хуулийн төсөл нь эдийн засгийн эрх чөлөөг төрөөс олгогдсон зохицуулалт бус, харин хүний заяагдмал эрх гэж үзэж, тэрхүү эрхийг хангах, хамгаалах, тэр дундаа төрийн зүй бус оролцооноос сэргийлэхэд чиглэгдсэнээрээ онцлогтой юм.
Монгол Улс төвлөрсөн төлөвлөгөөт эдийн засгаас татгалзаж, хувийн өмч, хувийн санаачилгад суурилсан зах зээлийн эдийн засгийг эргэлт буцалтгүй сонгосноо Үндсэн хуулиар баталгаажуулаад 35 жил өнгөрчээ. Гэвч цаг хугацааны явцад Үндсэн хуулийн уг үзэл санаа аажмаар бүдгэрч, чөлөөт эдийн засгийн орон зай хумигдсаар ирснийг оролцогчид онцолж байлаа. Өнөөдөр Үндсэн хуулийн суурь зарчим болон бодит байдал хоёрын хооронд үүссэн асар том ангалыг нөхөх, эрх зүйн баталгааг бодитой болгох нь уг хуулийн амин чухал зорилго болохыг хэлэлцүүлгийн үеэр тэмдэглэв.
Хуулийн төсөл батлагдсанаар хувийн хэвшлийнхэн өөрийн өмч, бизнесийн үйл ажиллагаагаа төрийн аливаа дарамт шахалтгүйгээр явуулах эрх зүйн (дархлаа) тогтоно гэж үзэж байна.
