МОНГОЛ–ХЯТАДЫН БИЗНЕСИЙН ХАМТЫН АЖИЛЛАГААГ БЭХЖҮҮЛЭХ ГУРВАН САНАМЖ БИЧИГТ ГАРЫН ҮСЭГ ЗУРЛАА
Монгол–Хятадын хөрөнгө оруулагчдын нэгдсэн арга хэмжээний хүрээнд хоёр улсын бизнес, эдийн засаг, санхүүгийн салбарын хамтын ажиллагааг шинэ шатанд гаргах гурван чухал хамтын ажиллагааны санамж бичигт гарын үсэг зурах ёслол амжилттай зохион байгуулагдлаа. Тус арга хэмжээ нь Монгол Улсын төрийн байгууллагууд, бизнесийн холбоод болон Хятадын хөрөнгө оруулалттай аж ахуйн нэгжүүдийн харилцан ойлголцлыг бэхжүүлэх, бодит төсөл, түншлэлийг дэмжих зорилготой юм.
ХОЁР ОРНЫ БИЗНЕС ЭРХЛЭГЧДИЙН ХАМТЫН АЖИЛЛАГАА ӨРГӨЖИЖ БАЙНА
Арга хэмжээний эхэнд Монголын Үндэсний Худалдаа Аж Үйлдвэрийн Танхим болон Монгол дахь Хятадын Ерөнхий Худалдааны Танхим хооронд хамтын ажиллагааны санамж бичигт гарын үсэг зурлаа.
Талууд санамж бичгийн хүрээнд мэдээлэл солилцох, гишүүн байгууллагуудын хамтын ажиллагааг өргөжүүлэх, үзэсгэлэн, форум бизнес аялал хамтран зохион байгуулах, аж ахуйн нэгжүүдэд үзүүлэх үйлчилгээ, нийгмийн хариуцлагын чиглэлээр хамтран ажиллах юм.
ЭРЧИМ ХҮЧНИЙ САЛБАРТ БОДИТ ТҮНШЛЭЛ ЭХЭЛЛЭЭ
Мөн “Петрочайна Дачин Тамсаг” ХХК болон “Петро Матад” ХХК хооронд хамтын ажиллагааны санамж бичигт гарын үсэг зурлаа.
Санамж бичгийн хүрээнд түүхий тос олборлох, хадгалах, тээвэрлэх, мөн хайгуул, олборлолтын бусад чиглэлээр хамтран ажиллаж, Монгол Улсын газрын тосны салбарт харилцан ашигтай, тогтвортой түншлэлийг хөгжүүлэхээр тохиролцов.
САНХҮҮГИЙН ХАМТЫН АЖИЛЛАГАА ГҮНЗГИЙРНЭ
Арга хэмжээний төгсгөлд Монгол дахь Хятадын Ерөнхий Худалдааны Танхим болон “Голомт” банк хооронд хамтын ажиллагааны санамж бичигт гарын үсэг зурлаа.
Энэхүү баримт бичгийн хүрээнд санхүүгийн үйлчилгээ, аж ахуйн нэгжүүдийн санхүүжилт, хил дамнасан төлбөр тооцоо, юанийн бизнесийг дэмжих чиглэлээр хамтын ажиллагааг өргөжүүлж, Монгол Улсад үйл ажиллагаа явуулж буй Хятадын хөрөнгө оруулалттай компаниуд болон хамтарсан төслүүдэд илүү таатай санхүүгийн орчин бүрдүүлэх юм.
Дээрх гурван санамж бичигт амжилттай гарын үсэг зурсан нь Монгол, Хятад хоёр улс худалдаа, эрчим хүч, санхүүгийн салбарт бодит үр дүнд чиглэсэн, нээлттэй, харилцан ашигтай хамтын ажиллагааг улам гүнзгийрүүлэх өргөн боломж байгааг харууллаа.
Талууд цаашид эдгээр санамж бичгийн хүрээнд тодорхой төсөл, хөтөлбөрүүдийг хэрэгжүүлж, хоёр улсын эдийн засгийн хамтын ажиллагаанд бодит хувь нэмэр оруулна гэдгээ онцоллоо.
