МОНГОЛ, ХЯТАДЫН ХАМТАРСАН ДУГУЙ ШИРЭЭНИЙ УУЛЗАЛТ ЗОХИОН БАЙГУУЛАГДЛАА
Монгол Улсын төрийн байгууллагууд болон Хятадын хөрөнгө оруулалттай аж ахуйн нэгжүүдийн хамтын ажиллагааг бэхжүүлэх зорилготой “Монголын төрийн байгууллагууд ба Хятадын хөрөнгө оруулалттай аж ахуйн нэгжүүдийн хамтарсан дугуй ширээний уулзалт” зохион байгуулагдлаа.
Уулзалтад Монголын Үндэсний Худалдаа, Аж Үйлдвэрийн Танхимын Ерөнхийлөгч Б.Лхагважав, Эдийн засаг, хөгжлийн дэд сайд С.Даваасүрэн, БНХАУ-аас Монгол Улсад суугаа Элчин сайдын яамны Эдийн засаг, худалдааны албаны зөвлөх Лиү Жинжи, Монгол дахь Хятадын Ерөнхий Худалдааны Танхимын дарга Кан Дө Чуан нар оролцож, байр сууриа илэрхийллээ.
Эдийн засаг, хөгжлийн дэд сайд С.Даваасүрэн хэлэхдээ, Монгол Улс болон Бүгд Найрамдах Хятад Ард Улс нь худалдаа, хөрөнгө оруулалт, эдийн засгийн хамтын ажиллагааны тэргүүлэх түншүүдийн нэг бөгөөд хоёр улсын эдийн засгийн харилцаа олон жилийн турш тогтвортой, бодит үр дүнтэйгээр хөгжиж ирсэн гэдгийг онцоллоо. Тэрбээр Хятадын 15 дахь таван жилийн төлөвлөгөө, инновац, шинжлэх ухаан, технологид суурилсан хөгжлийн бодлого нь Монгол–Хятадын хамтын ажиллагаанд шинэ боломжуудыг нээж байгааг дурдав. Мөн Монгол Улсын Засгийн газар макро эдийн засгийн тогтвортой байдлыг хангах, бизнесийн орчныг сайжруулах, гадаадын хөрөнгө оруулалтыг дэмжих чиглэлээр хууль эрх зүйн цогц шинэчлэлийг үе шаттай хэрэгжүүлж буйг тэмдэглэж, дэд бүтэц, эрчим хүч, уул уурхай, хөдөө аж ахуй, үйлдвэрлэл зэрэг стратегийн салбаруудад урт хугацааны, харилцан ашигтай хамтын ажиллагааг хөгжүүлэхэд хөрөнгө оруулагчид, бизнес эрхлэгчдийн идэвхтэй оролцоо чухал болохыг онцоллоо.
МҮХАҮТ-ын Ерөнхийлөгч Б.Лхагважав хэлэхдээ, Хятадын хөрөнгө оруулалттай компаниуд Монгол Улсад бизнесийн үйл ажиллагаа явуулах, хөрөнгө оруулалт хийхэд тулгарч буй бодит асуудлыг хэлэлцэх, холбогдох төрийн байгууллагуудтай санал солилцох зорилгоор энэхүү дугуй ширээний уулзалтыг зохион байгуулж байгааг онцоллоо. Тэрбээр Монголын эдийн засгийг төрөлжүүлэх, өндөр технологид суурилсан салбаруудыг хөгжүүлэхэд Хятадын хөрөнгө оруулагчдын туршлага, хөрөнгө оруулалт чухал ач холбогдолтойг тэмдэглээд, МҮХАҮТ-аас хоёр орны бизнес эрхлэгчдийн хамтын ажиллагааг бодитоор дэмжин ажиллахаа илэрхийллээ.
Дугуй ширээний уулзалтын үеэр хоёр улсын эдийн засаг, худалдаа, хөрөнгө оруулалтын орчны өнөөгийн нөхцөл байдал, цаашдын хамтын ажиллагааг өргөжүүлэх боломж, төр-хувийн хэвшлийн уялдаа холбоог сайжруулах асуудлаар санал солилцов.
Мөн Хятадын хөрөнгө оруулалттай аж ахуйн нэгжүүдийн Монгол Улсад үйл ажиллагаа явуулахад тулгамдаж буй асуудал, тэдгээрийг шийдвэрлэх боломжит гарцын талаар хэлэлцсэн юм.
Тус уулзалтыг МҮХАҮТ-ын Гүйцэтгэх захирал Ц.Магнайбаатар чиглүүлэн, БНХАУ-аас Монгол Улсад суугаа Элчин сайдын яам, Монголын Үндэсний Худалдаа, Аж Үйлдвэрийн Танхим, Монгол дахь Хятадын Ерөнхий Худалдааны Танхим хамтран зохион байгууллаа.
