МОНГОЛ НООЛУУР ХЯТАДЫН “CIIE U-FAIR” ҮЗЭСГЭЛЭНД ОНЦЛОГ БОЛЖ ОРОЛЦОВ
Хятадын Олон улсын импортын үзэсгэлэн (CIIE)-ийн хүрээнд анх удаа зохион байгуулагдсан “CIIE U-FAIR” үзэсгэлэн 2025 оны 12 дугаар сарын 19–21-ний өдрүүдэд БНХАУ-ын Шанхай хотын Үндэсний үзэсгэлэнгийн төвд амжилттай зохион байгуулагдлаа.
Тус үзэсгэлэнд дэлхийн 50 гаруй орны 700 аж ахуйн нэгж оролцож, өндөр чанартай, өргөн хэрэглээний брэнд бүтээгдэхүүнүүдээ танилцуулсан юм. Үзэсгэлэнгийн ерөнхий зохион байгуулагчаар Шанхай хотын Үндэсний үзэсгэлэнгийн төв ХХК ажилласан бөгөөд Хятадын Олон улсын импортын үзэсгэлэнгийн хүрээнд тодорхой салбарын чанартай бүтээгдэхүүнийг өргөжүүлэн сурталчлах, хэрэглэгчдэд чиглэсэн худалдааг дэмжих, худалдан авагч, үйлчилгээ үзүүлэгч, бизнесийн түншүүдийг холбох зорилготойгоор зохион байгуулагдсан онцлогтой байв.
Анх удаа зохион байгуулагдсан энэхүү үзэсгэлэнд Монгол Улсын уул уурхайн бус экспортын гол бүтээгдэхүүн болох ноолууран бүтээгдэхүүнийг онцлон “Монгол ноолуур” сэдвийн хүрээнд тусгай талбай байгуулж, ноолууран бүтээгдэхүүн үйлдвэрлэгч 7 аж ахуйн нэгжийг зохион байгуулан оролцууллаа.
“CIIE U-FAIR” үзэсгэлэнд “Монгол ноолуур” сэдвээр оролцсоноор БНХАУ-ын хэрэглэгчдэд Монголын гарал үүсэл тодорхой, нэмүү өртөг шингэсэн, өндөр чанартай ноолууран бүтээгдэхүүнийг бодитоор таниулахын зэрэгцээ зорилтот хэрэглэгчдэд чиглэсэн экспортын шинэ боломжийг нээсэн чухал ач холбогдолтой үйл ажиллагаа боллоо.
