ЭМЭГТЭЙ БИЗНЕС ЭРХЛЭГЧДИЙН ЭКСПОРТЫН ЧАДАВХЫГ НЭМЭГДҮҮЛЭХЭД АНХААРАН АЖИЛЛАЖ БАЙНА

Дэлхийн Худалдааны Байгууллага (ДХБ) болон Олон улсын худалдааны төв (ITC)-ийн санаачилгаар хэрэгжиж буй “Цахим эдийн засаг дахь эмэгтэй экспортлогчдыг дэмжих” (WEIDE) төслийг МҮХАҮТ амжилттай хэрэгжүүлж байна.

Тус төслийн хүрээнд Монгол Улсаас нийт 307 эмэгтэй бизнес эрхлэгч өрсөлдөж, тэднээс 47 эмэгтэй бизнес эрхлэгч шалгарсан бөгөөд шалгарсан оролцогчид нь санхүүгийн буцалтгүй дэмжлэг, техникийн туслалцаа, зөвлөх үйлчилгээ, чадавх бэхжүүлэх сургалтуудад хамрагдан, зах зээлд өрсөлдөх чадвараа нэмэгдүүлж байна.

WEIDE төслийн хэрэгжилтийг дэмжин ажиллаж буй зөвлөхүүдийн төлөөлөлтэй МҮХАҮТ-ын Ерөнхий нарийн бичгийн дарга Б.Саруул уулзалт хийлээ. Уулзалтын үеэр төслийн оролцогчдын явц, тулгарч буй сорилтууд, цаашдын дэмжлэгийн чиглэл болон 2026 оны үйл ажиллагааны төлөвлөгөөний талаар санал солилцов.

Тухайлбал, үзэсгэлэн худалдаа зохион байгуулах, pop-up store нээх, төслийн хүрээнд бий болсон сайн туршлагуудыг олон нийтэд таниулах, мөн эмэгтэй бизнес эрхлэгчдэд зориулсан санхүүгийн дэмжлэгийн боломжуудыг нэмэгдүүлэх асуудлуудыг онцлон хэлэлцлээ.

МҮХАҮТ нь WEIDE төслийг хэрэгжүүлэх замаар эмэгтэй бизнес эрхлэгчдийн цахим худалдаанд оролцох боломжийг өргөжүүлж, экспортын чадавхыг нэмэгдүүлэхэд анхааран ажиллаж байна.