Гадаад харилцааны яамтай хамтын ажиллагааны санамж бичгийг шинэчлэн байгууллаа

Дэлхийн ЭКСПО болон бусад олон улсын ЭКСПО, үзэсгэлэн, форумд Монгол Улсын оролцоог хангах зэрэг хэд хэдэн чиглэлээр хамтран ажиллахаар ГХЯ, МҮХАҮТ хооронд Санамж бичиг байгууллаа.

Санамж бичигт Гадаад харилцааны сайд Д.Цогтбаатар, МҮХАҮТ-ын Ерөнхийлөгч О.Амартүвшин нар гарын үсэг зурлаа.

МҮХАҮТ нь анх 2013 онд ГХЯ-тай Санамж бичиг байгуулсан бөгөөд Санамж бичгийг хэрэгжүүлэх төлөвлөгөөг жил бүр хамтран гаргаж хэрэгжүүлдэг. Энэ удаа ирэх 3 жилд хэрэгжүүлэх ажлуудыг төлөвлөн, уг Санамж бичгийг шинэчлэн байгуулж байгаа юм.

Санамж бичгийн хүрээнд:

1. “Монгол Экспорт” хөтөлбөрийг хамтран хэрэгжүүлэх,
2. Монгол Улсын бараа бүтээгдэхүүн, үйлдвэрлэлийг гадаадад сурталчлан таниулах, Монголын брэнд бүтээгдэхүүн бий болгох хүрээнд олон улсын үзэсгэлэн, холбогдох арга хэмжээг хамтран зохион байгуулж, мэдээлэл солилцох,
3. Гадаад худалдааг хөгжүүлэх нэг цонхны бодлогыг хамтран хэрэгжүүлэх,
4. Монгол Улсаас бусад улстай байгуулж буй хоёр талын болон бүс нутгийн Чөлөөт худалдааны хэлэлцээрүүдийг бизнес эрхлэгчдэд сурталчлах, хэрэгжүүлэхэд хамтран ажиллах,
5. ДХБ-ын Худалдааг хөнгөвчлөх хэлэлцээр болон холбогдох бусад хэлэлцээрүүдийг Монгол Улсад хэрэгжүүлэх чиглэлээр талууд идэвхтэй хамтран ажиллах зэрэг зорилтуудыг тусгаад байна.