ИТАЛИ-МОНГОЛЫН БИЗНЕС ФОРУМ АМЖИЛТТАЙ ЗОХИОН БАЙГУУЛАГДЛАА

МҮХАҮТ, ГХЯ болон Италийн хөрөнгө оруулалтын агентлагтай хамтран зохион байгуулсан Итали Монголын бизнес форум Италийн үзэсгэлэнт нутагт амжилттай болж өндөрлөлөө.

Хаалтын арга хэмжээнд МҮХАҮТ-ын Ерөнхийлөгч Б.Лхагважав оролцон Монгол Улс байгалийн баялаг, хөдөө аж ахуй, аялал жуулчлал, сэргээгдэх эрчим хүчний салбарт өргөн нөөцтэй бол Итали улс өндөр технологи, үйлдвэрлэлийн чиглэлээр тэргүүлэгч туршлагатай. Эдгээр харилцан нөхөх давуу тал нь шинэ төслүүд эхлүүлэх, түншлэлийг гүнзгийрүүлэх суурь болохыг онцлоод, Монголын талаас 70 гаруй компанийн удирдлагууд форумд оролцож буй нь хоёр орны бизнес эрхлэгчдийг шууд холбож, бодит хамтын ажиллагааны боломжийг нээж буй гэдгийг хэлэв. Тэрээр цаашид бизнес уулзалт, форумыг тогтмолжуулж, 2026 онд Монгол Улсад Монгол–Италийн бизнес форумыг зохион байгуулахад МҮХАҮТ бэлэн байгааг мэдэгдэн Италийн түншүүдийг Монголын хөгжил, шинэ боломжуудтай танилцахыг урив.

Тус форумд хоёр улсын 150 гаруй бизнес эрхлэгч, төр, хувийн хэвшлийн төлөөллүүд оролцож, арьс шир, ноос ноолуур, хүнсний үйлдвэрлэл, худалдаа, аялал жуулчлал худалдаа, хөрөнгө оруулалтын хамтын ажиллагааг шинэ шатанд гаргах боломжийн талаар хэлэлцлээ.