ИТАЛИЙН “VOIELLO” ПАСТАНЫ ҮЙЛДВЭРИЙН ҮЙЛ АЖИЛЛАГААТАЙ ТАНИЛЦАВ
Итали Монголын бизнес форумын оролцогчид Европын нэр хүндтэй “Voiello” пастаны үйлдвэрийн технологи, менежментийн туршлагаас суралцлаа. Уулзалтын үеэр хоёр тал үйлдвэрлэлийн дижитал шийдэл, хүний нөөцийн ур чадвар, экспортын боломжийн талаар санал солилцов.
Италид пастаны үйлдвэрлэл өндөр түвшний автоматжуулалттай, бүтээгдэхүүн үйлдвэрлэлийн бүх үе шат нь ухаалаг системээр хянуулагддаг нь онцлог. Ингэснээр бага хүний нөөцөөр өндөр бүтээмжтэй ажиллах, өртөгийг бууруулах, дэлхийн зах зээлд өрсөлдөхүйц чанартай бүтээгдэхүүн тогтвортой экспортлох боломж бүрддэг аж.
“Voiello” брэнд нь Европ даяар нийт 21 үйлдвэртэй, 8,875 ажилтантай томоохон сүлжээг бүрдүүлдэг бөгөөд жил бүрийн борлуулалтын орлого нь 4.9 тэрбум евро-д хүрдэг дэлхийн хэмжээний үйлдвэрлэгч юм. Тус компани Италийн үндэсний хүнсний үйлдвэрлэлийн жишиг бизнесүүдийн нэг бөгөөд олон улсын чанарын стандартыг хамгийн өндөр түвшинд мөрддөгөөрөө алдартай ажээ.
Уулзалтын төгсгөлд талууд ирээдүйд хамтын ажиллагааг өргөжүүлэх, технологи дамжуулах болон Монголын хүнсний үйлдвэрлэлийн экспортын чадавхыг нэмэгдүүлэх боломжийг судлан ажиллахаар тохиролцов.
