МҮХАҮТ-ЫН ГҮЙЦЭТГЭХ ЗАХИРАЛ Ц.МАГНАЙБААТАР ОУХБ-ЫН БНХАУ, МОНГОЛ УЛСЫГ ХАРИУЦСАН ТОВЧООНЫ ЗАХИРАЛ ЧАНХИ ЛИГ ХҮЛЭЭН АВЧ УУЛЗЛАА
Монголын Үндэсний Худалдаа Аж Үйлдвэрийн Танхимын Гүйцэтгэх захирал Ц.Магнайбаатар Олон Улсын Хөдөлмөрийн Байгууллагын БНХАУ, Монгол Улсыг хариуцсан товчооны захирал ноён Чанхи Лиг хүлээн авч уулзлаа.
Уулзалтын эхэнд Олон Улсын Хөдөлмөрийн Байгууллага болон МҮХАҮТ-ын хэсэг хугацаанд зогсонги болсон байсан харилцаа сэргэж өнгөрсөн богино хугацаанд Монголын Бизнесийн орчин дахь Хүнд суртлын индексийг тодорхойлох судалгаа, гишүүн байгууллагуудад үзүүлэх үйлчилгээний чанар хүртээмжийг дээшлүүлэх зорилго бүхий шат дараалсан чадавхижуулсан сургалт зохион байгуулах зэргээр дэмжлэг үзүүлэн, хамтын ажиллагаагаа хөгжүүлж буйд Ц.Магнайбаатар захирал талархал илэрхийллээ.
Нөгөө талаас ноён Чанхи Ли бизнесийн байгууллагуудын төлөөлөл болсон, 65 жилийн түүхтэй Монголын Үндэсний Худалдаа Аж Үйлдвэрийн Танхимын хөдөлмөр нийгмийн хамгааллын албан ёсны түншлэгч байгууллага болсонд талархалтай байгаагааг илэрхийлээд Монгол Улсад төдийгүй дэлхий нийтэд тулгамдсан асуудал болоод буй хөдөлмөрийн зах зээлийн эрэлт, нийлүүлэлтийн зөрүүтэй байдал, ажлын байран дахь хүний нөөцийн хөгжил, хүний нөөцийн зөв удирдлагын асуудалд хамтран ажиллах талаар бэлэн байгаагаа илэрхийллээ.
