МОНГОЛ, ЯПОНЫ БИЗНЕСИЙН ХАМТЫН АЖИЛЛАГАА ЭРЧИМЖИЖ БАЙНА
МҮХАҮТ-ын ерөнхийлөгч Б.Лхагважав болон МҮХАҮТ-ын Япон дахь Салбар Танхимын Дарга У.Өлзийням нар XII ТХХЗУ-ын Монгол, Японы хувийн хэвшлийн салбар зөвлөлдөх уулзалтад Монголын талын бизнес төлөөлөгчдийг ахлан оролцов.
Уулзалтаар талууд Монгол, Японы хооронд байгуулсан Эдийн засгийн түншлэлийн гэрээ (EPA)-ний 10 жилийн хэрэгжилт, ололт амжилт, тулгамдаж буй асуудлыг хэлэлцэж, хоёр улсын худалдаа, хөрөнгө оруулалтын өсөлтийг үргэлжлүүлэн дэмжих шаардлагатайг онцлов.
Энэ уулзалт нь Монголын бизнес эрхлэгчдэд Япон руу чиглэсэн хөрөнгө оруулалт, хамтын ажиллагааны боломжийг танилцуулах, туршлага солилцох чухал платформ болж, Монголын талын төлөөлөгчид нь худалдаа, үйлдвэрлэл, үйлчилгээний салбарын тэргүүлэгч компаниудыг төлөөлсөн байна.
Талууд уулзалтын үр дүнд хоёр улсын хувийн хэвшлийн хамтын ажиллагааг бэхжүүлэх, эдийн засгийн уялдаа холбоог сайжруулахад санал нэгдэж, цаашид тогтвортой хамтран ажиллахаа илэрхийллээ.
