МОНГОЛ–ЯПОНЫ ТӨР, ХУВИЙН ХЭВШЛИЙН XII ЗӨВЛӨЛДӨХ УУЛЗАЛТ ТОКИО ХОТНОО АМЖИЛТТАЙ БОЛЖ ӨНДӨРЛӨЛӨӨ
МҮХАҮТ-ын Ерөнхийлөгч Б.Лхагважав болон Танхимын 15 гишүүн компанийн төлөөлөл Япон улсын Токио хотноо зохион байгуулагдсан Монгол–Японы төр, хувийн хэвшлийн XII зөвлөлдөх уулзалтад оролцлоо. Жил бүр уламжлал болгон болдог энэхүү уулзалт энэ удаад Улс тунхагласны баярын өдрөөр тохиож, хоёр улсын эдийн засаг, худалдаа, технологийн хамтын ажиллагааг өргөжүүлэх чухал арга хэмжээ боллоо.
Уулзалтын нээлтэд МҮХАҮТ-ын Ерөнхийлөгч Б.Лхагважав хэлсэн үгэндээ, Энэ жил Японы Осака хотод болж буй “Кансай 2025” Олон улсын Экспог онцлон дурдав. Тэрээр Монгол, Японы хамтын ажиллагаа жил ирэх тусам өргөжин тэлж, зөвхөн эдийн засаг, худалдаагаар хязгаарлагдахгүйгээр техник технологи, ногоон эдийн засаг, дижитал шилжилт зэрэг олон салбарт шинэ шатанд гарч буйг тэмдэглээд МҮХАҮТ эдгээр чиглэлд хоёр талын хамтын ажиллагааг дэмжин, идэвхтэй оролцохын бэлэн гэдгийг онцоллоо.
Нээлтийн ажиллагаанд Монголын талаас Шадар сайд Х.Ганхуяг болон МҮХАҮТ-ын Ерөнхийлөгч Б.Лхагважав нар, Японы талаас Эдийн засаг, аж үйлдвэрийн дэд сайд К.Ямада, Гадаад хэргийн яамны дэд сайд Т.Шимада, Япон–Монголын эдийн засгийн хорооны дарга Х.Цүбай нар оролцож, хоёр улсын эдийн засгийн стратегийн түншлэлийг улам гүнзгийрүүлэхийн ач холбогдлыг онцлон тэмдэглэлээ.
Монгол, Япон хоёр улсын хооронд 1972 онд дипломат харилцаа тогтоосноос хойших 53 жилийн хугацаанд харилцаа хамтын ажиллагаа шинэ агуулгаар баяжиж, эдийн засгийн түншлэл тогтвортой өргөжин хөгжиж ирсэн.
Сүүлийн 30 гаруй жилд Япон Улсаас Монгол Улсад хийсэн шууд хөрөнгө оруулалт 1.15 тэрбум ам.доллароос давсан бөгөөд хоёр улсын худалдааны эргэлт 2024 оны эцсийн байдлаар 1.2 тэрбум ам.долларт хүрсэн нь эдийн засгийн хамтын ажиллагаа тогтвортой өсөн нэмэгдэж буйг харуулж байна.
Уулзалтын үеэр МҮХАҮТ-ын гишүүн компаниуд болон шинжлэх ухаан, технологийн байгууллагын төлөөллүүд салбарын хамтын ажиллагааны чиглэлийн талаар илтгэл хэлэлцүүлэв. “Хоргын гол” компанийн захирал Д.Долгоржав “Цөлжилтийн эсрэг” сэдвээр илтгэл тавьж, уур амьсгалын өөрчлөлт, хөрсний доройтол, байгаль хамгааллын чиглэлд Монгол, Японы хамтын ажиллагааг өргөжүүлэх шаардлагыг онцолсон бол ШУТИС-ын Проректор Д.Цолмонбаатар “Монгол–Японы шинжлэх ухаан, технологи–аж үйлдвэрлэлийн хамтын ажиллагааны хөгжил” сэдвээр илтгэл тавьж, хоёр улсын технологийн инновац, инженерчлэлийн интеграцийн шинэ боломжуудыг танилцууллаа.
Монгол–Японы төр, хувийн хэвшлийн XII зөвлөлдөх уулзалт нь хоёр улсын эдийн засаг, шинжлэх ухаан, инновац болон ногоон хөгжлийн салбарын хамтын ажиллагааг шинэ шатанд гаргах чухал уулзалт болж өндөрлөлөө.
