МҮХАҮТ-ЫН ЕРӨНХИЙЛӨГЧ Б.ЛХАГВАЖАВ ТАЖИКИСТАН УЛСЫН ЭЛЧИН САЙД ХАЙРУЛЛО ИБОДЗОДАГ ХҮЛЭЭН АВЧ УУЛЗАВ
МҮХАҮТ-ын Ерөнхийлөгч Б.Лхагважав Бүгд Найрамдах Тажикистан Улсын Монгол Улсад хавсран суугаа Онц бөгөөд Бүрэн Эрхт Элчин сайд Хайрулло Ибодзодаг хүлээн авч уулзлаа. Уулзалтын үеэр 2025 оны 7 сард зохион байгуулагдсан Монгол–Тажикистаны Бизнес форумын үр дүн, хоёр улсын худалдааны эргэлтийн өсөлтийн талаар талууд санал солилцож, цаашдын хамтын ажиллагааг өргөжүүлэх боломжийг онцлон тэмдэглэв.
Элчин сайд Хайрулло Ибодзода хүнс, хөдөө аж ахуй, аялал жуулчлалын салбарт хамтран ажиллах өргөн боломж байгааг дурдан, хоёр улсын бизнес эрхлэгчдийг холбох механизм, хамтын ажиллагааны шинэ чиглэлийн талаар ярилцав. Тэрээр мөн Монгол сарлагийг Тажикистан улсад нутагшуулах боломжийг сонирхож буйгаа илэрхийлэв.
Ерөнхийлөгч Б.Лхагважав Тажикистан Улсын Рогун болон Нурек усан цахилгаан станцын туршлага, инженерийн шийдэл, менежментийг судлах нь Монголын эрчим хүч, усны нөөцийн менежментийн салбарт чухал ач холбогдолтойг онцлов. Тэрээр Тажикистан улс нь Төв Азийн усны нөөцийн гол бүрдүүлэгч орон бөгөөд Амударья, Сырдарья зэрэг томоохон гол мөрний эхийг тэтгэдэг мөсөн гол, усны баялаг нь бүс нутгийн тогтвортой хөгжил, усны аюулгүй байдлын бодлогод стратегийн байр суурь эзэлдэг гэдгийг тэмдэглэв.
Талууд цаашид усны нөөцийн менежмент, эрчим хүч, хөдөө аж ахуй болон бизнесийн салбаруудад хамтын ажиллагааг өргөжүүлж, хоёр улсын эдийн засгийн харилцааг шинэ түвшинд хүргэхэд хамтран ажиллана гэлээ.
Уулзалтад МҮХАҮТ-ын ЕНБДарга Б.Саруул, ГХХАГ-ын дарга Б.Солонго нар байлцлаа.
