СҮҮ ХК ОНЫ ШИЛДЭГ АЖ АХУЙН АЯЛЛЫН ХҮРЭЭНД ҮЙЛ АЖИЛЛАГААГАА ТАНИЛЦУУЛЛАА
Оны шилдэг аж ахуйн аяллын хүрээнд Танхимын гишүүн байгууллагын 30 гаруй компанийн төлөөлөл хүнсний салбарын манлайлагч СҮҮ ХК-ийн үйл ажиллагаатай танилцлаа.
Зочдыг тус компанийн Гүйцэтгэх захирал Б.Гантулга хүлээн авч уулзан компанийн зах зээл дэх байр суурь, бүтээгдэхүүн үйлдвэрлэлийн үйл явц, нийгмийн хариуцлагын төслүүдийн талаар танилцууллаа.
Энэ жил СҮҮ ХК нь ТОП-100 аж ахуйн нэгжийн жагсаалтын 56-д эрэмбэлэгдсэн бөгөөд энэхүү амжилтын ард олон улсын стандартад нийцсэн техник, технологийн шинэчлэл, шинэ үеийн хэрэгцээнд тохируулсан инновац шингэсэн бүтээгдэхүүнүүд, өдөр бүр шаргуу хөдөлмөрлөдөг хамт олны зүтгэл, мөн 67 жилийн турш хамт байсан үнэнч хэрэглэгчид чухал нөлөө үзүүлжээ.
Тус компани нь Улаанбаатар хот болон 21 аймгийн 330 сумын хэмжээнд сүү сүүн бүтээгдэхүүнийг өдөр бүр шинээр үйлдвэрлэн, эрүүл, чанартай, аюулгүй иргэдэд хүргэн үйлчилж байна. Ингэснээр СҮҮ ХК нь хүн амын эрүүл хооллолт, хүнсний үйлдвэрлэлийн тогтвортой хөгжилд үнэтэй хувь нэмэр оруулж, эрүүл хүнсний соёлыг түгээгч, хэрэглэгчдийн итгэлийг түүчээлэгч үндэсний бахархалт компани болж чаджээ.
Уулзалтын төгсгөлд МҮХАҮТ-ын Гүйцэтгэх захирал Ц.Магнайбаатар оны шилдэг аж ахуйн аялал нь гишүүн байгууллагуудын туршлага солилцох, шинэ санаа, инновацыг судлах, бизнесийн харилцааг өргөжүүлэх чухал платформ болж байна. Өнөөдрийн СҮҮ ХК-ийн үйл ажиллагаатай танилцах нь хүнсний салбарын амжилтын түүх, шинэ технологи, менежментийн шилдэг туршлагыг бодитоор харах, бүтээгдэхүүн боловсруулах, үйлдвэрлэлийн шинэ технологи нэвтрүүлэх боломжуудыг судлахад чухал ач холбогдолтой юм гэдгийг онцоллоо.
