“ЭРДЭНЭС ҮТП” ХХК-ИЙН “ОЛБОРЛОЛТООС БОЛОВСРУУЛАЛТ РУУ” ӨДӨРЛӨГ БОЛЛОО
“Эрдэнэс ҮТП” ХХК-ийн зохион байгуулсан “Олборлолтоос Боловсруулалт руу” үйлдвэр, технологийн паркийн төслийг танилцуулах өдөрлөг амжилттай болж өндөрлөлөө.
Энэхүү арга хэмжээ нь Монгол Улсын үндэсний үйлдвэрлэл, технологийн салбарт шинэ эргэлт авчрах юм.
Тус өдөрлөгийн үйл ажиллагаанд МҮХАҮТ-ын Гүйцэтгэх захирал Ц.Магнайбаатар оролцон үг хэллээ. Тэрээр, Уул уурхайн хараат байдлаас гарах, импортын хамаарлыг бууруулахын тулд нэмүү өртөг шингэсэн үйлдвэрлэл, инноваци, технологи зайлшгүй хэрэгтэй. Үйлдвэр, технологийн паркуудыг хөгжүүлж, төр-хувийн хэвшлийн хамтын ажиллагааг идэвхжүүлэх нь энэ замын түлхүүр юм. Ноос ноолуурын боловсруулалтыг нэмэгдүүлж, эцсийн бүтээгдэхүүн болгож экспортод гаргавал орлогыг 3-4 дахин өсгөх боломжтой гэдгийг хэлээд Танхимын зүгээс их дээд сургуулиудтай бизнесийн инновацийн таатай орчныг бүрдүүлэх, “Эрдэнэс ҮТП”-тэй гадаад, дотоодын хөрөнгө оруулалтыг татах, паркийн нэгжүүдэд бизнесийн байгууллагуудыг татан оролцуулах, судалгаа, хөгжлийн төвүүдийг дэмжин хөгжүүлэх чиглэлээр хамтран ажиллахад бэлэн байгааг хэллээ.
Өдөрлөгийн үеэр “Эрдэнэс ҮТП” ХХК нь Монгол Улсын 6 байршилд үйлдвэрлэл, технологийн паркуудыг байгуулах, хөгжүүлэх стратегийн төлөвлөгөө, төслийн ач холбогдлыг дэлгэрэнгүй танилцуулсан юм. Энэхүү төсөл нь уул уурхайн салбараас эцсийн бүтээгдэхүүн боловсруулах хүртэлх гинжин холбоог бэхжүүлж, эдийн засгийн бүтцийг төрөлжүүлэх, нэмүү өртөг шингэсэн бүтээгдэхүүн үйлдвэрлэх боломжийг нээхэд чиглэсэн стратеги бөгөөд олон улсын жишигт нийцсэн үйлдвэрлэл, технологийн дэд бүтцийг бий болгохыг зорьж байгаа аж.
Арга хэмжээнд бизнес эрхлэгчид, хөрөнгө оруулагчид, төрийн болон хувийн хэвшлийн төлөөлөгчид өргөнөөр оролцож, санал солилцсон бөгөөд төсөлд хамтран ажиллах эрмэлзэл, боломжийн талаар ярилцсан нь онцлог байлаа. Мөн оролцогчдод үйлдвэрлэл, технологийн парк байгуулах ажлын үр дүн, менежментийн шилдэг туршлага, инновацийн шинэ шийдлүүдийг танилцуулсан нь ихээхэн сонирхол татав.
