ХААН БАНК ЦАМХАГТ “ОНЫ ШИЛДЭГ АЖ АХУЙН НЭГЖ” ТАНИЛЦАХ АЯЛАЛ АМЖИЛТТАЙ БОЛЛОО
МҮХАҮТ-аас жил бүр уламжлал болгон зохион байгуулдаг “Оны шилдэг аж ахуйн нэгжүүдийн танилцах аялал” энэ удаад нийслэлийн төвд сүндэрлэсэн ХААН Банк цамхагт болов. Аялалд танхимын гишүүн 20 гаруй аж ахуйн нэгжийн төлөөлөл оролцож, банкны шинэ төв байр, дотоод зохион байгуулалт, ухаалаг инженерчлэл, инновацийн шийдэлтэй газар дээр нь танилцан цамхагийн эрчим хүчний хэмнэлттэй шийдэл, ногоон барилгын стандарт, харилцагч төвтэй үйлчилгээний шинэ орчинтой танилцаж, хотыг бүх талаас харах боломжтой өндөр давхраас панорам үзэмжийг үзлээ.
Энэхүү аялалд МҮХАҮТ-ын дэд захирал Ч.Баттулга оролцон “Энэ аялал нь бизнесийн байгууллагууд туршлага солилцож, салбар бүрийн сайн жишгийг ойроос харах боломж олгодог чухал арга хэмжээ” гэдгийг онцлоод ХААН Банк цамхагийн ухаалаг инженерчлэл, ногоон барилгын шийдэл, хэрэглэгч төвтэй үйлчилгээний шинэ орчныг өндөр үнэлж, инновацид суурилсан байгууллагуудын хөгжил нь улс орны бизнесийн орчинд эерэг нөлөө үзүүлж байгааг дурдлаа.
Хаан банкны зүгээс Стратеги хариуцсан дэд захирал Ю.Төрмөнх банкны үйл ажиллагаа, дижитал шилжилт, харилцагч төвтэй үйлчилгээний шинэ загвар, цамхгийн техник шийдэл, Жижиг, дунд бизнесийн банкны газрын захирал Б.Эрдэнэсүрэн газрын үйл ажиллагаа, ЖДБ-уудыг дэмжих төсөл, сургалт, зөвлөх үйлчилгээний үр дүнгийн талаар тоо баримттай мэдээлэл хуваалцсан бөгөөд жижиг, дунд үйлдвэрлэл эрхлэгчдийг зах зээлд нэвтрүүлэх, экспортыг нэмэгдүүлэх хөтөлбөрүүд үр дүнтэй хэрэгжиж байгаа талаар, Тогтвортой хөгжлийн газрын захирал М.Мандахмягмар банкны ногоон санаачилга, тогтвортой хөгжлийн бодлого болон ирээдүйн зорилтын талаар товч мэдээллүүдийг өглөө.
ХААН Банк нь эмэгтэй бизнес эрхлэгчдэд зориулсан шинэ бүтээгдэхүүн, дижитал шийдлүүдээ танилцуулж, цахимаар зээл хүсэх, төлбөр тооцоо хялбаршуулах, өөрөө үйлчлэх боломжийг нэмэгдүүлэх зэрэг үйлчилгээнүүдийг үзүүлдэг нь жижиг, дунд бизнес, тэр дундаа эмэгтэй бизнес эрхлэгчдийн санхүүгийн хүртээмжийг нэмэгдүүлэхэд чиглэсэн
алхамууд юм гэдгийг оролцогчид онцлоод барилгын ухаалаг систем, эрчим хүч хэмнэлтийн шийдэл, харилцагч төвтэй дотоод зохион байгуулалт болон ажиллах орчны шинэ соёлыг мэдрэн, цамхагийн өндөр давхраас хотыг тольдох мөч нь аяллын хамгийн сэтгэл татам хэсэг байлаа гэдгийг хэлж байлаа.
