“ӨӨРӨӨР СЭТГЭЕ” УРИАН ДОР ЧАНАРЫН ХӨГЖИЛ, ИННОВАЦИЙГ ДЭМЖИВ
Дэлхийн чанарын өдрийг тохиолдуулан Монгол Улсын Шадар сайдын ивээл дор жил бүр зохион байгуулдаг “Үндэсний чанарын чуулган–2025” энэ жил арав дахь удаагаа “Өөрөөр сэтгэе” уриан дор амжилттай зохион байгуулагдлаа. Чуулган чанарын хөгжил, инноваци, байгууллагын өрсөлдөх чадварыг шинэ түвшинд хүргэх зорилгоор төр, хувийн хэвшил, олон улсын байгууллагуудын төлөөлөл, салбарын мэргэжилтнүүдийг нэгтгэсэн цогц арга хэмжээ боллоо.
Чуулганы нээлтэд УИХ-ын гишүүн, Монгол Улсын Шадар сайд Х.Ганхуяг, Стандарт, хэмжил зүйн газрын дарга С.Батбаатар, МҮХАҮТ-ын гүйцэтгэх захирал Ц.Магнайбаатар болон Олон улсын худалдааг дэмжих төслийн (ITDM) удирдагч Стефан Мозер нар оролцож үндэсний чанарын тогтолцооны өнөөгийн байдал, цаашдын хөгжлийн талаар байр сууриа илэрхийлэв.
Шадар сайд Х.Ганхуяг хэлсэн үгэндээ Засгийн газраас 2024–2028 онд чанар, стандартын тогтолцоог шинэчлэх, бизнесийн өрсөлдөх чадварыг нэмэгдүүлэх, үндэсний үйлдвэрлэлийг дэмжих бодлого хэрэгжүүлж байгааг онцлон тэмдэглэв. Тэрээр “Алсын хараа–2050”, “Шинэ Итгэл–Эрс шинэчлэл” бодлогын хүрээнд эдийн засгийн бүтцийг төрөлжүүлэх, импорт орлох үйлдвэрлэлийг дэмжих, экспортыг өргөжүүлэх, технологид суурилсан үйлдвэрлэл хөгжүүлэх шаардлагыг цохон тэмдэглэж, чанар, стандартын тогтолцоо нь хэрэглэгчийн эрх ашгийг хамгаалах, бизнесийн таатай орчныг бүрдүүлэх суурь хэрэгсэл гэдгийг онцоллоо.
СХЗГ-ын дарга С.Батбаатарын мэдээлснээр Дэлхийн чанарын өдөр 1989 оноос эхлэн дэлхий нийтээр тэмдэглэгдэж ирсэн бол Монгол Улсад 2015 оноос хойш Үндэсний чанарын чуулган тогтмол зохион байгуулагдаж, чанар, стандартаар тэргүүлэгч байгууллагуудыг “Үндэсний чанарын шагнал”-аар шалгаруулдаг уламжлал бүрджээ. Тэрээр энэ жилийн “Өөрөөр сэтгэе” уриа нь чанарын менежментийг шинэ өнцгөөс харах, инноваци болон тасралтгүй сайжруулалтыг дэмжих зорилготойг онцлов.Чанарын баталгаажуулалтын үйлчилгээг ил тод, шуурхай хүргэх зорилгоор cert.masm.gov.mn цахим системийг ашиглалтад нэвтрүүлсэн бөгөөд уг систем нь Гаалийн ерөнхий газар, Татварын ерөнхий газар, МҮХАҮТ, E-Mongolia, Төрийн төлбөр тооцооны GPS систем зэрэг байгууллагын мэдээллийн сантай холбогдон нэг цонхны зарчмаар үйлчилгээг үзүүлэх боломжийг бүрдүүлээд байна. Мөн “Стандартчилал, техникийн зохицуулалт, тохирлын үнэлгээний итгэмжлэлийн тухай” хуулийн шинэчилсэн найруулга боловсруулагдаж, УИХ-ын хэлэлцүүлэгт ороход бэлэн болоод байгааг танилцууллаа. Уг хууль нь стандартын хэрэгжилтийн хяналтыг сайжруулах, иргэдийн эрүүл, аюулгүй орчныг хангах тогтолцоог бэхжүүлэх чухал шинэчлэл болох юм гэлээ.
Чуулганы үеэр чанарын бодлого, менежмент, инновац, олон улсын чиг хандлага, байгууллагын өөрчлөлт, шинэчлэлийн боломжуудын талаар мэргэжилтнүүд илтгэл тавьж, оролцогчид үндэсний үйлдвэрлэлийн чанар, үйлчилгээний соёл, олон улсын стандартад нийцсэн шийдлүүдийн талаар өргөн хүрээтэй санал солилцов.
Мөн нээлтэд МҮХАҮТ-ын гүйцэтгэх захирал Ц.Магнайбаатар хэлэхдээ, Чанар бол бизнесийн тогтвортой хөгжлийн суурь бөгөөд удирдлагын тогтолцоо, бүтээгдэхүүн үйлчилгээний чанарыг сайжруулах замаар олон улсын түвшинд хүрэх боломжтойг онцолж, чанарын дэд бүтцийг олон улсын нийтлэг жишигт нийцүүлэхийн төлөө хамтран ажиллахаа илэрхийллээ.
“Үндэсний чанарын шагнал–2025” эздээр “Шилдэг бүтээгдэхүүн” номинацад Бага рашаант ХХК-ийн “Амин чанар” брэнд, “Шилдэг үйлчилгээ” номинацад Сентрал Фүүдс ХХК, “Шилдэг байгууллага” номинацад Очир Дагинас ХХК тус тус шалгарлаа. Үндэсний чанарын шагнал”-д шалгарсан аж ахуйн нэгж байгууллагуудын өргөмжлөл цомыг “Монгол Улсын Засгийн газрын гишүүн, Шадар сайд Х.Ганхуяг, Стандарт хэмжил зүйн газрын дарга С.Батбаатар, МҮХАҮТ-ын Ерөнхийлөгч Б. Лхагважав нар гардуулан өгч амжилт хүслээ.
Энэ удаагийн чуулган нь чанарын соёлыг шинэ шатанд хүргэж, инноваци, тогтвортой хөгжлийн бодлогыг бизнесийн салбарт нэвтрүүлэх, төр-хувийн хэвшлийн хамтын ажиллагааг бэхжүүлэхээс гадна Чанарын шагнал хүртсэн байгууллага, аж ахуйн нэгжүүдийн бараа бүтээгдэхүүний үзэсгэлэн танилцуулга хийгдлээ.
